中醫

好多姊妹都問, 化療時可唔可以睇中醫呀? 我既腫瘤科醫生寬寬就比我化療時食中藥, 但叫我如要睇都一定搵個新派既中醫, 即係有讀大學既中醫, 所有野有根有據, 唔好搵老中醫開古方唔知入面有乜東東既黎睇. 如你好想化療期間去睇, 記得記得記得要問清楚你既腫瘤科醫生.

但我就冇喺化療期間睇中醫, 原因係我擔心化療期間又中又西, 有起事上黎都唔知邊樣出事, 不如喺化療期間注意飲食, 注意排毒, 等做完療程先用中藥去調理.

我自己化療完會不定時去睇下中醫, 冇長期服用, 好似前排, 我覺得個心好似突然幾下跳得好快, 仲令到我瞓唔到覺, 我先去睇寬寬, 照一下心電圖, 寬寬話係有少少異常, 但我唔應該feel到既不適, 佢建議我可以帶住一部機24小時check下心跳問題, 但我覺得好煩, 於是我話再觀察下先, 咁我就試下中醫睇下有冇效先.

我既中醫師- 何桂萍中醫, 佢係一個好細心既婦科中醫, 雖然佢後生, 但係佢問診問得好仔細, 斷症仲好準, 我一講個情況比佢聽, 佢就話我係心悸, 應該係標靶藥影響, 佢開左6日藥比我, 我食左第一劑已減輕左8成, 跟住6日後好返lu, 但我開始覺得氣管好似成日有度氣喺到, 令到我好似喘, 想咳.

於是我又去睇何醫師, 我問何醫師, 其實我係唔係感冒啊? 何醫師把脈後話唔係有病, 佢問我近排係唔係好大壓力呀? 我話冇呀, 佢再問我: 咁係唔係好多野諗呀? 我都係….社運加疫情, 令到香港經濟轉差, 我公司都要面臨減薪, 我大女喺外國讀緊書, 細仔又讀緊國際學校, 我的確係有擔心份工, 仲有會諗下阿女, 諗下阿仔, 的確係好多野諗既…….何醫師同我講, 之前有一個病人, 佢有過度換氣情況, 其實係患者太多野諗或壓力過大而呼吸得唔好所致, 我聽完哈哈大笑: 唔係呀麻, 點會唔記得呼吸好架, 何醫師話真架, 你可以留意下.

於是我真係好認真去留下自己呼吸, 發現自己呼吸原來好淺, 跟住即刻吸大啖啲, 再飲左劑中藥, 居然真係冇晒事

我發覺病後我既身體反應好明顯, 稍為有啲唔舒服, 身體好快出到反應, 等我好快去尋求答案, 但當然可能以前都有, 只係自己唔察覺又或者ignore左, 大家都要注意呼吸啊! 吸氣……呼氣