乳房發現硬塊

返工就收到醫院電話，叫我去見醫生，我都心知不妙，不過仍然阿Q咁諗，可能有異常，但一般都冇乜野既。

見到醫生，佢只簡單解釋照到硬塊，大約喺右邊乳房1點位置，建議去抽針，醫生話睇個形狀只係唔太靚，有啲一睇就睇到係cancer，先去抽針再睇睇咩黎自算。我都仲好阿Q覺得例行檢查以策安全。

返到公司問下同事抽針有冇醫生推介，同事介紹柳醫生比我，話佢兩個朋友有乳癌都係睇佢，佢自己檢查都搵呢個醫生，診所喺公司附近，岩晒我，就打去約，姑娘十分細心，我講左個情況後就約到第二日去。

上網搵下資料，見到話大部份人都係良性，所以心都定啲。

當晚我仲同家庭醫生傾左一陣電話，佢睇左片話嚿野係有啲樣衰，但又唔係衰到好明顯，抽針confirm下係應該，仲提我記得打麻醉，好吧！既然你咁講，我都係快快做左自己安心。