今日又有姊妹畢業啦- Lyann

我地you’re not alone 2.0 好短時間就去到123人, 咁多人我實在冇辦法照顧好每一個姊妹, 但我經常提醒佢地, 有問題記得要PM我, 如果自己OK, 就交比姊妹們互相幫助, Lyann係冇乜PM我既一個, 因為佢可以同姊妹們一齊並肩作戰, 你冇乜PM我, 證明你一直都好OK, 同埋姊妹們發揮到守望相助, 呢個位真係令我無比既感動, 你既畢業感言最後一段講: 手術、治療化療帶來的不適已差不多忘記，但手術留下來的疤痕永不磨滅，就好似每一天都提住自己這次是上天給你的第二生命，你要好好對自己，要比以前過得更精彩有意義。咁多位好姊妹我定一定要一齊笑、一齊老、一個都不能少, 記得許下左呢個承諾呀! 祝福你以後要身體健康, 每日都懷住感恩既心開開心心過每一日!!!

***********************************

Lyann畢業感言:

隨着落藥儀的’咇’一聲長嚮，歷時四個多月的抗癌之路總算暫時告一段落暫且可鬆一口氣今天係我一生中’第二次小學畢業‘心情的確比上次小學畢業更加激動, 內心有說不出感受。

回想七月中時突然被確診乳癌（七月頭明顯有粒似蚊爛物體在右胸2點位置～就係佢喇）成個星期原封不動仍然屹立不倒在我胸上，心知不妙立刻做乳房x光、超聲波、抽針檢驗，當時連醫生都同我打定輸數，個一剎那我人生跌進萬劫不復嘅深淵，腦裏有千萬個問號，手裏的紙巾都唔知喊濕咗幾多包，就連下午要返工的我都忘記了回到家真係唔知點同老公講，感覺就係作為一個女人，小小嘢都保唔住..好失敗！好失敗！但當我老公知道後只係一個‘冇乜所謂啦，呢啲都是表面來的，著咗衫咪乜都唔知，我哋結咗婚咁多年冇所謂啦，最緊要你安全無事，其餘嘅嘢就乜都唔緊要‘就係佢呢個說話就好似同我打了支好強嘅強心針，我就同自己發誓為咗我老公、仔女、媽咪、愛我的人，我一定要醫好自己，打贏呢場仗，亦因為佢呢個說話我九秒九收聲去食飯接下來一連寸排山倒海嘅見外科醫生、整型醫生、切唔切、全切局切、要唔要做化療、幾千個問號？？？令我抖不過氣來。就在我最徬徨無助的時候上天好似憐憫我，特派咗個使者比我～Jacqueline 同佢在WhatsApp短短傾了幾句，我感覺好安心、好實在好有安全感，佢仲好似一個好溫柔的媽媽照顧住我哋。之後Jacqueline仲帶多咗一班天使來守護住我，呢班天使好有大愛，無論你有幾多問題，佢哋都唔嫌麻煩一一解答你，當你有心事佢哋又會好耐心去開解你，好似一個大家咁。真心好多謝你哋呢班素未謀面嘅姊妹，多謝你哋帶領住我由原本好驚唔知點做變到內心更強大越戰越勇再到今日小學畢業呢個group ～

「you’re are not alone」真係拯救了好多迷途小羔羊希望大家可以一路傳承落去，幫助更多有需要的姊妹。

手術、治療化療帶來的不適已差不多忘記，但手術留下來的疤痕永不磨滅，就好似每一天都提住自己這次是上天給你的第二生命，你要好好對自己，要比以前過得更精彩有意義。咁多位好姊妹我定一定要一齊笑、一齊老、一個都不能少

嗚謝：多謝@jacdueline~無你就無今日的我。

多謝@Ada~ 多謝你每天都帶比我哋歡樂。

多謝@ sandy ~ 多謝你時常提供好多有用的資訊