化療前準備篇
2020 年 3 月 10 日 治療注意事項 化療前通常都好忙, 有咩忙呢? 因為好多野要準備, 等我開張清單比姊妹們, 可以準備下:
– 假髮, 可以去揀定一個合適既假髮, 最好係揀返同自己開針前既髮型, 而家啲假髮超級真, 如果揀返到自己個髮型相近既, 係冇乜人發覺你戴左假髮架, 到開左針12日到去剃頭, 帶住個假髮走
– 綉眉/飄眉: 化療時會甩晒全身既毛髮, 連眉毛都甩埋, 可以化療前去整整條眉, 就算甩晒眉毛都唔會好冇精神咁
– 洗牙, 因為化療時白血球會偏低, 所以盡可能喺化療前去洗牙補牙, 做晒先. 如果唔係化療期間白血球偏低, 去整牙會增加感染風險啊!
– 食物, 整個化療過程都要吸取大量蛋白質, 蛋白質除左對升白血球有幫助, 仲可以減低化療副作用:
– 所以一定要買雞蛋, 我會買無激素雞蛋, 每朝3隻蛋白1隻蛋黃
– 水果: 記得買厚皮水果呀 每日都飲果汁, 食水果, 幫助排毒
–>我會買西瓜, 紅白肉火龍果, 橙, 菠蘿, 紅石榴(must item),紅菜頭…….我頭5日多數飲西瓜汁加紅石榴, 總之乜都加紅石榴
– 開針前一日就煲定竹蔗紅蘿蔔馬蹄水, 記住不可以落矛根, 化療針好燥, 頭5-7日都要好注重排毒同清熱, 咁先唔會口爛
可能有讀者見到以上咁多野會問, 咁多野飲點飲得晒? 除左飲以上既野仲要記得飲多啲水呀, 係真係要飲咁多野先可以幫助排走毒素, 排毒最基本既方法係poo poo, vv & 汗
暫時記得既係咁多, 如果有姊妹記得仲有乜野漏, 歡迎提出, 我再加上去