化療期間飲食篇
2019 年 7 月 7 日 Jacqueline的抗癌經歷 | 治療注意事項 | 飲食我從前大大部分時間都照顧人，而家要接受別人去照顧，坦白講感覺幾奇怪，但同自己講要去改變，唔好再乜都自己頂起晒，特別要接受父母既照顧，因為喺呢個時候再去拒絕佢地既照顧，佢地一定會好難受，自己人黎架麻，唔應該有唔好意思！
我化療期間好注重蛋白質，每日都諗食乜野提高蛋白質，花生衣水，雞蛋白，牛扒不可少，我爸爸媽媽為左我冇食得咁悶，佢地將花生衣水加左好多元素，去到後期變為超級湯。
早餐：一定係3隻蛋白加果汁，因為我冇打升白針，所以我要特別努力去提升白血球，吸收高蛋白質對我特別重要，我曾經試過蛋白粉，好難食，我見佢寫一匙等如一隻蛋白，一日3匙，咁我就一日3隻蛋白，蛋黃都好有營養架，應該都要食1隻既蛋黃，但我唔鍾意食，所以我只食3隻蛋白。
至於果汁：我每星期去西環果欄 新利欄鮮果批撥 (果籃 、批撥、禮盒、送禮、生果、水果)買一星期水果，可以add佢地Facebook, 佢地可以send個水果list比你落order送貨，化療期間唔方便出去都可以有水果食。我每次一定買既係紅石榴，西瓜，其餘有乜當造就買乜，但以厚皮水果為原則，因為薄皮生果有農藥，所以我會買橙，菠蘿，紅白肉火龍果等等，我每朝打開雪櫃，鍾意乜就放乜入blender到打成果汁飲2大杯。
另外，化療針係燥熱，所以我會飲西瓜汁，椰青水，紅蘿蔔竹遮馬蹄水（千萬唔好加茅根，茅根係中藥啊）花生衣水呢，我媽咪有時煲清保涼，有時係加蓮藕，再加腰豆，合桃，腰果等，煲瘦肉或牛骨同花膠，另外會燉石崇魚湯，佢會加紅棗，龍眼肉，花膠等，甜到爆炸
我有時會用媽咪既湯煮米粉做lunch
我打完每針化療都會食杯雪糕獎下自己，開心下，但記得買細杯裝一次食晒，雪糕入面有奶係唔太好既，但乳癌基金會姑娘都話一小杯冇問題，所以我就開心食一小杯啦！
PS: 其實冇野毒得過支化療針架啦，所以唔洗太擔心一定要食乜，一定唔可以食乜，只要開心就好，但有4樣野醫生吩咐要unfriend佢地：燕窩、雪蛤膏、當歸、蜂皇精
如果要打標靶就連苦橙，西柚都要戒埋啊