又一個畢業啦 – Erica

我一路睇Erica既畢業感言, 真係一路睇一路流眼淚……

Erica, 我睇得出你係外剛內柔既女仔, 轉數又快, 你同Ada令到我地2.0好有活力, 由一期變三期真係唔容易接受, 好感恩2.0帶到比你正面既態度去迎戰, 好感恩天父帶你地黎比我, 你地倚靠我, 但你地亦成為我既天使, 第時你仔娶老婆唔好唔記得請我飲呀, 寫完呢段感言後, 記得要反思, 我地以後一齊做個開心快活人, 一齊變老

小學畢業旅程

15/6/2020

我確診左乳癌，抽針話係原位癌，我同老公開心到喺海港城攬埋一舊，我老公係咁話：原位癌即係冇事啦，做左手術就會好返晒，唔使擔心，仲係咁咀我，好啦益下佢啦

17/6/2020

我搵埋細佬一齊返屋企先敢向父母交代我病情，同埋要做手術。點知我好渣呀，講都講唔到淨係喊，好彩我老公好冷靜咁講到出黎，仲安慰到我父母。我阿爸阿媽仲勁，話幾十歲有咩風浪未見過，結果即刻量血壓俾我睇，話冇事，叫我專心治療就ok喇，錢嘅野唔使擔心，我又喊到甩轆

20/6/2020

做左一個8個鐘嘅手術，因為疫情唔俾家人陪，我要自己一個入去，其實勁淆，臨入去仲要喊到收唔到，好彩姑娘有攬實我同安慰我。

做完手術上到病房，父母細佬同老公都喺度等我，睇得出佢地好擔心我。因為之前梁醫生有講過打左顯影劑，做完手術塊面可能藍藍地，我即笑笑口問有冇變左阿凡達，佢地話：都冇仲諗住笑我。最搞笑係，我阿爸無啦啦拎張支票出黎同我老公交收，叫我唔使擔心手術費我同我細佬笑到抽筋，問佢係咪玩野，呢個時候交收支票。

24/6/2020

收到術後報告，我呆左笑唔出喇，因為本身話我只係一期，只需電療，而家變左要化療。當刻只有我自己一個聽報告，仲要喺張病床上面，唔郁得。

當時個心好亂，出現好多疑問，我仔未夠3歲，點湊佢呀？我而家要化療又要點同阿爸阿媽細佬老公講叫佢地唔好擔心？我好驚，我喺度諗化療係咪要全年訓喺張床度，無力無氣咁，食野又要人餵？請工人又請唔切，點算？化療係點架（我唔知係打針）？我會唔會瘦到人乾咁架（而家答：冇，仲重左）一無所知嘅我，一路喊一路搵資料。竟然俾我喺fb搵到Jacqueline ，佢好好人，好快回覆我，令到我好心安，仲帶埋我入you’re not alone2.0

一入到Group已經感受到各位姐妹嘅愛，大家都好用心去關心新姐妹，回答我嘅疑問，令我清晰左治療條路點行，各位師姐樂觀積極治療嘅態度，改變晒我對化療嘅諗法，原來真係仲有氣有力咁湊仔，仲可以湊仔返學，化療真係並不可怕，因為個個姐妹都勁精神，我並不孤單。

22/7/2020-6/11/2020

開始化療嘅旅程，係會有副作用，不過有好多方法舒緩，攰都係頭一星期嘅事，雖然胃頂頂又試過，成面暗瘡頭瘡又試過，食野變味又試過，頭痛腳痛骨痛又試過，連痔瘡都生埋，但所有野都安然渡過，因為多得各位師姐同姐妹每次落針抽血嘅集氣，又教我食啲乜飲啲乜排毒，我先可以咁樂觀，傻下傻下咁完成呢個化療。

可能我失憶太嚴重，我諗返成個化療過程又冇乜太辛苦，好似左場夢咁，仲要每次就落針都勁興奮，因為我知道康復嘅日子越來越接近

多謝嘅說話黎喇

多謝我阿爸阿媽，要照顧呢個女仲要膽拖照顧埋個孫仔，感激你地對我嘅愛，無限付出。幾十歲都要你地擔心，真係唔好意思我好愛你地架

多謝我細佬咁撐我，咁關心家姐，錫晒你

多謝我老公，我知你好愛我喇，我都好愛你，雖然你長期講野激我同做Kai野

多謝我個仔，雖然你未識字，但我會讀俾你聽，媽咪真係好愛你，我知你成日都好擔心媽咪又要去打針，但媽咪已經小學畢業喇，放心啦

@Jacqueline Tong多謝你無私地開You’re not alone, 令到我傷心個窿填返埋，積極打呢場仗。亦多謝你介紹寬寬俾我，令我安心打大佬。

@Jessie Ng-多謝你喺我一入Group係咁鼓勵我，仲送癌奶俾我，所以啲癌奶特別好味。

@SandyC-多謝你成日報講座，俾左好多有用資訊俾各位姐妹

@Elaine多謝你教我用濕紙巾抹patpat, 仲拍片教我鼓勵我教我打升白針（我冇俾人睇架）

@Charmaine 多謝你對我嘅關心，又拍片教大家做運動舒緩。

@Candy-多謝你知我轉打白針會骨痛，主動關心我

@Goldie- 多謝你，我地FEC三人組成員，互相扶持互相鼓勵

@Ada Cheng 打氣我嘅戰友，我知你錫我嘅，你特登喺大家面前串我，掩飾對我嘅愛，終於我哋都小學畢業之後嘅路一齊衝呀

最後，感謝各位師姐，姐妹，愛你地呀

完成治療後，我地真係要互相提大家，珍惜第二次生命，學識愛，學識慢活，學識欣賞，學識放下，大家一齊老一齊笑，一齊湊孫。