又多一個姊妹畢業 – Celine

Celine係四期既姊妹, 初初佢搵我唔係經我既page, 係經一個親子網站, 佢發現時有骨轉移, 一有轉移醫生就會定為4期, 4期呢兩粒字真係好可怕, Celine都唔例外, 期後我介紹左同係4期既小Win比Celine識, 當然仲將Celine加入我地you’re not alone大家庭, Celine一直沉著應戰, 佢既治療都好漫長, 但佢好冷靜咁一步一步行, 終於尋日終極畢業啦, 恭喜你呀Celine, 好鍾意你既感言最後一part, 我截錄出黎分享比大家, 好感恩你有正面既思想, 我地反思過後就會越來越好架啦~

**呢排成日睇返以前嘅相，我發現點解淨係影個仔，咁少合照嘅，自己去咗邊度？原來我一直都忘記咗自己. 治療雖然受了不少皮肉之苦，但這些經歷會使我們變得堅強、勇敢感恩上天給我機會反思過去、重新出發，改變自己唔好嘅習慣和思維，活出第二生命，期望有健康嘅身體陪伴仔仔長大、同老公退休、同姊妹們一齊變老。姊妹們，今天嘅付出是為了走更遠嘅路，我們一起拖實手走過去**

我的畢業感言

2019年11月是灰暗的，突然摸到右胸有硬塊，在短短幾天內做了一系列檢查，被確診乳癌四期(因為有骨轉移)。太突然了吧，當時想：我好快會死嗎？我仔咁細無咗媽媽點算？老公無我照顧如何生活？年邁父母怎能接受這種打擊？一想眼淚就缺堤成個人落晒型

真係好好彩，響BK遇上大佬Jacq，她帶我入You’re not alone群組，用無私大愛幫助迷途羔羊去面對呢個病，認識同路人，了解到不同姊妹嘅治療方法和資訊。原本對呢個病嘅恐懼是源於無知，認識多咗心就定咗好多，找到信任嘅醫生一步一步去拆彈。就是這樣，按照醫生意見做了卵巢切除手術，切斷荷爾蒙對癌細胞生長的影響，然後服用抗荷爾蒙標靶藥和AI，目標用六個月，縮小乳房腫瘤和停止進一步擴散。這六個月內，我如常返工和生活，情緒上當然有起伏，好難唔去諗病嘅嘢，尤其擔心藥物是否有效？無效仲可以點醫？

六個月後再做petscan，好感恩原本嘅骨轉移、淋巴轉移都熄咗燈，乳房腫瘤也縮少了，醫生表示標靶藥對我有效，可以做手術切走d衰嘢啦。7月22日做了右乳全切+背重建手術，術後報告Ki67 由確診時40%下降至2%， 醫生說不用化療9月14日完成了16次乳房電療，11月2日完成了8次骨電療，整個過程順利(除了胸電療嘅副作用稍為難受)。之後就繼續服用標靶藥+Al，控制癌細胞不要活躍。

我喺本命年48歲犯太歲確診那段時間精神壓力好大、情緒唔好。呢幾個月病假係我工作二十多年來停低最耐嘅時間，諗返過去嘅十年，我為了工作、仔仔、家庭付出了全部嘅氣力去做好每一個角色，我得到了我想要嘅嘢，但卻突然殺出呢個病。呢排成日睇返以前嘅相，我發現點解淨係影個仔，咁少合照嘅，自己去咗邊度？原來我一直都忘記咗自己以前唔敢約朋友夜晚出街吃飯，怕老公黑面，但而家諗返轉頭，我已經做咗咁多，點解我要受呢啲委屈？我一定要搵返自己出嚟、做想做嘅事啊

治療雖然受了不少皮肉之苦，但這些經歷會使我們變得堅強、勇敢感恩上天給我機會反思過去、重新出發，改變自己唔好嘅習慣和思維，活出第二生命，期望有健康嘅身體陪伴仔仔長大、同老公退休、同姊妹們一齊變老。姊妹們，今天嘅付出是為了走更遠嘅路，我們一起拖實手走過去、努力加油呀You’re never alone，love you all