‘四両撥千斤’ 情緒工作坊

10月22日

“DRAW ALL YOU CAN, MADE IMPOSSIBLE POSSIBLE”

‘四両撥千斤’ 情緒工作坊

好多時, 乳癌患者都會因為唔想人擔心, 甚至乎難於啟齒, 而唔敢講比屋企人同身邊朋友知道自己患病, 往往只能將心中不快往肚裡吞, 好返之後又要面對之後既生活, 點再面對自己既工作? 生活習慣? 飲食? 自己性格同想法呢? 好多時康復路上反而仲覺得吃力。

乳您一起You’re not alone好榮幸被HKIOC & Daiichi Sankyo贊助, 我地初初構思時係想做一啲唔係普遍Yoga呀, 小手工呀, 希望做啲有意義又幫到姊妹既 workshop, 於是我地邀請到Change Management教練去用黑白畫舒緩下大家情緒, 喺畫畫既過程, 我地體驗到由不可能變可能, 其實只要我地踏出一步落筆去畫, 就會變為可能, 同樣我地面對個病, 復康之路, 我地好多時都話唔得改變, 但原來我地勇敢地踏出一步就可以了。

我地人太多, 16人一場, 我地一天內搞足3場, 全場爆滿, 大家一黎到以為係聽talk, 一知道要畫畫, 好多姊妹同我講: 會長, 畫畫我唔掂架, 點算呀? 點可以畫得咁靚架, 我一定唔得架啦!!! 我都同佢地講: 先唔好否定自己, 我地一齊畫, 就好似我地group既宗旨咁, 我地手拖手一齊行, 一陣你就會發現, 原來只要勇敢地踏出一步, 你就可以架啦

當大家畫下畫下, 跟住畫完見到自己既作品時, 連佢地都唔可以相信自己可以畫到咁靚, 大家既feedback都係好開心, 好有成功感, 3個小時可以放空, 時間唔夠, 好enjoy!

我見到你地開心, 我就開心了, 當日我自己踩足3場, 最後一場我同寬寬醫生同兩位姊妹一齊畫, 我地誤打誤撞畫左一幅”與/乳您一起”既畫出黎, 大家覺得靚唔靚先?

再一次好多謝HKIOC & Daiichi Sankyo既贊助, 比到一個好好既回憶同埋啟發我地! 期待下一次有更好多workshop.

#乳您一起youarenotalone

#bcyouarenotalone

#HKIOC

#DaiichiSankyo

#四両撥千斤