最後一針-安全到步

由第一針到最後一針，我好感恩，除左第一針辛苦d外，暫時都精神好，中氣十足，有咁既成績，幕後功臣不可少，好多病友醫好都話多謝有呢個病，令佢地叮一聲去多愛自己，多去感恩，多活在當下，多享受生活，我都有同感，懂事以來，都冇乜試過只顧好自己既時間，有呢個病真係得到好多。

多謝老公呢幾個月既包容，愛護，每天充足水果，牛扒，雞，菜，湯水，每天3隻蛋白，令我十分足夠蛋白質同營養，幫我盡量排清化療藥既毒，仲為左我可以安全出去行下而買左架車，陪我去人少既地方吸新鮮空氣，等我好快recover，同埋下針冇咁辛苦，當我甩頭髮高峰期死都唔剃頭，飄到周圍都係頭髮，你只講唔緊要，只要我ok就冇問題，好彩戴左cool cap最後冇甩晒，戴帽還可

多謝我既父母，哥哥細佬，J&J仲有兩位姑奶-我有病覺得最對唔住係爸爸媽媽，冇好好照顧自己身體，仲要你地擔心，好愧疚。你地不但冇害怕，仲話唔緊要，一家人一齊頂，仲不辭勞苦地無恨湯水，隔天既花生衣湯，牛肉水，清保涼紅蘿蔔水，石崇魚花膠湯，仲有牛肉，冬菇魷魚蒸豬肉…….好多款等我唔好覺得悶，令我身體復原快，提升紅白血球，清潤乜都有，你地係我感到有媽爸的孩子永遠像個寶。兩位姑奶無限背後支持，二姑奶仲請左幾日假陪我睇醫生，感激！

仲有May May, 佢為左幫我排毒，而我又唔係成日都在狀態，好多時當我ok就調動好多客既schedule，等Jenny可以黎幫我做spa機去清多餘既排毒，減輕下一針既不適。

仲有公司老闆，同事 – 公司經濟上既支持，醫療（令我可以喺私定化療），病假，同事幫忙處理我既工作，十分體諒，令我冇後顧之憂地去醫病。

仲有同事介紹個好好既外科醫生比我（柳漢榮醫生），朋友介紹個好好既腫瘤科醫生比我（張寬耀醫生），令到由手術到化療都好順利，整個化療，我一針升白針都冇打過，全因醫生既經驗，就算我每針白血球跌到0都從容地繼續唔需要升白針，從容地相信我係得，令我唔洗受升白針既骨痛痛苦。

仲有不記名既好好好朋友，幫我有release情緒既，有出埋錢請我去化解心中既唔開心既，有專登整炒米茶比我既，有幫我處理保險賠償既，仲有你你你/妳妳妳地既關心與問候，我一一收到晒，無言感激，令我覺得打呢場扙一點都不寂寞，令我常充滿力量去衝，無畏無懼。

仲有仲有我班病友，由確診一刻既無助，孤獨，恐懼，到佢地將我加入whatsapp group分享好多感受，經驗，資訊，令我發現同路人既重要性，佢地無施既分享，令我安心好多好多（如有親朋戚友有乳癌，歡迎pm我，我可以add佢入呢個group架）

最後我要多謝自己，多謝自己冇收埋自己，樂觀，感恩地去接受家人，朋友既幫助，多謝自己好快接受現實，改變思想，學識活在當下，輕鬆面對所有不適，我會好好愛自己，唔會再令大家擔心架啦

黎緊會電療同埋繼續3星期一針標靶（仲有14針）但呢2樣都好ok, 冇乜副作用，會好快重回正軌既生活架啦