第二針後
2019 年 3 月 26 日 Jacqueline的抗癌經歷 第二針後, 開始甩頭髮了, 可幸我係一條條飄落黎, 我知道戴左cool cap後都會甩, 但對我黎講都係覺得好可怕呀, 我自己戴呢個cool cap都做定心理準備, 做定會甩晒既心理準備, 每日做左小鳳姐, 吹呀吹讓這風吹, 抹乾眼眸裡亮晶的眼淚…….哀傷通通帶走, 管風裡是誰
執下執下又一日, 於是我都係去買定個假髮做back up啦.
打完第一針2星期, 打針位對上出現一撻野, 初初有少少痕, 跟住就有少少脫皮, 之後冇野, 第二針時, 呢撻野就到上去鎖骨, 我問寬寬點解, 佢話係敏感黎, 我問佢下次攻上我塊面咪大鑊? 佢又笑笑口咁話叫姑娘除左cool cap外, 比多一個cool mask我撻落塊面到, 等啲藥水唔好去到
我個醫生永遠都咁輕鬆, 令我乜擔心都冇晒啦
我每針都會搵一個姨姨黎同我按摩排毒, 等我啲毒盡排出黎, 咁下一針就冇咁辛苦, 加上打完化療針會周身骨痛, 每次姨姨做完, 我成個人都輕晒, 有張相就係按前同按後既分別啦, 但但但………如果術前化療就唔好按, 因為未拆彈, 我唔建議啊!!! 就呢個按摩, 我其實上網睇左好多分享, 手術後又傷口埋晒口, 只要唔好按腫瘤同腋下淋巴位, 其實係有助舒緩架, 但記住記住術前化療唔建議啊!!!
PS. 化療期間, 會覺得味覺有變, 會有機會食野變苦/ 冇味/ 鐵鎸鏽味, 我就冇苦冇鐵鏽味, 但我會味覺比較淡, 有個新加坡朋友教我可以食紫菜, 可以吸走啲唔好野, 我試過又真係有啲用, 但食一塊半塊好啦, 因為化療藥係燥, 都易喉嚨痛, 所以食完記得飲多啲水呀