電療過程

好多姊妹問我, 點解冇左篇電療篇, 原因係我都唔知要寫啲乜好, 因為我唔知自己係皮膚好定有精油有幫助, 總之我就係用左偏方, 所以一直都唔好意思寫出黎分享, 但姊妹們話佢地只係參考, 會自己分析, 咁我就寫篇電療篇比大家參考一下啦:

4月17號化療最後一針, 5月8號就約左電療劃位, 好快啊, 第一次去到電療部, 佢叫我換衫, 我望住件衫好耐都唔知點算, 因為佢係綁繩, 但綁喺後面, 咁穿左落去點綁呀, 諗左一陣突然醒起, 可以張件衫綁繩既位向前, 跟住綁好左轉返去後先穿袖就得啦, Chemo brain真係唔係浪得虛名, 仲會有個超市既籃比你放個人物品, 老套到爆

好啦, 終於換好啦, 入到去, 有假髮就除假髮, 有帽就除帽, 跟住又赤裸裸咁比幾個人圍住你研究一番, 電療設計師同腫瘤科醫生一齊睇位, 然後就去比設計師劃位, 政府會主張幫你紋9點剌青喺身到, 方便電療時個位置準確啲, 跟住設計師就會幫你個身痴膠紙以防甩色, 如果甩色但未開始電就要返去補色架啦. 唔同醫院有唔同做法, 有啲就話甩晒都冇所謂, 有啲就叫你唔好整甩佢, 所以記得要聽醫護人員既說話呀.

劃完10日左右就通知我5月20號開始電, 其實呢段時間我都好忐忑, 電我喎, 咩感覺呢? 會唔會好痛呢? 會唔會黑既呢? 十萬個為什麼????? 終於到第一次去到東區醫院既3號機啦, 第一次瞓上去, 電療師居然話今日唔係電我比左好多勇氣先瞓上張床到, 點知唔係電係final劃位即係我仲要擔心多一日啦.

又好不容易到第二日啦, 今次真係電啦, 頭頂上面有支扶手, 你要舉高手握住個扶手, 個人完全唔可以郁架, 醫護人員幫你移好位就撤退, 得返我一個喺電療室入面, 跟住部機就開始運作, 咦! 淨係聽到聲, 冇感覺既?!?!電療就係咁架? 車……擔心左咁多就係咁, 之後電療時我就覺得好悶, 越叫我唔郁, 我就越想郁, 但真係唔可以郁架, 於是我喺到數綿羊, 數到120下就完lu

我總共電15+5次, 15次全乳房電再加5次電腫瘤位置, 電死佢, 電到佢冇得翻生 電到十幾次後, 我有啲紅紅地, 話咁快6月18號就電完最後一次, bye bye啦, 一陣再寫篇電療護理篇.