麗娟既畢業感言

麗娟入黎群組時已經做晒化療手術, 入黎時係電療中, 部份既姊妹好少喺group入面出聲, 但原來佢地係有睇post, 但得閒出下聲等大家知道你地平安都好架, 就好似麗娟今日話比我地知, 佢今日畢業了!!

好感人既畢業感言, 雖然我地冇陪住你化療同手術, 但你屋企人比你既力量係好大好大, 見到你話入左group後真真正正感覺到<You’re not alone>, 感謝上天終於比我地咁多人拖到你隻手, 我地一日係戰友, 終生係朋友, 多謝你唔放棄自己咬緊牙根去打嬴呢場仗! 以後好返架啦, 我地一齊手拖手到老!!

特別多謝我既好好好朋友Ivy, 麗娟有保險問題唔知點算, 我請左Ivy Lee 幫手嘗試下幫佢, 雖然唔知幫到幾多, 因為唔同保險公司, 但能力範圍內一定盡幫, 喺呢到特別多謝Ivy呀!!!

***************************************

會長&各位姊妹：

我今日做完最後一次電療，終於畢業啦！

千言萬語，無以言喻，百般感受在心裡。

2019年5月，我由被怀疑、誤診，到最後确診。果时冇入到group，冇資訊，冇乳癌知識，個腦一片空白。曾經猶豫過、掙扎過、逃避過，無助過。搵醫生，約期，做檢查，睇報告，轉醫生，尋找最佳治療方法；呢個過程急、准、快。

父母蒼老既容貌，令我同好多姊妹一樣，選擇隱滿。死亡令人恐惧，但我更害怕見到父母傷心個樣。化療之前，除咗去睇醫生，其他時間我照常返工。我冇有太多時間去傷心，並唔係我冇心冇肺、冇感覺，而係我知道，醫呢個病要使好多錢。

2019年6月我開始治療了，打停經針、裝人工血管、打化療、打升白針、做基恩檢測等等。同好多姊妹一樣，化療時會唔舒服、作毆、冇胃口、手指變黑、手腳麻痹、骨痛、失眠、白血球低，甚至紅血球指數過低個頭暈到需要輸血，過程好辛苦。活下去係我堅持既目標，胃口唔好，我就逼自己飲食流質物。

10月22號，我做手術了。屋漏逢連夜雨，因疫情醫院唔准陪診唔准探訪，一個人好孤單。手術前一日因喉嚨有痰，只可以局部麻醉做手術。係手術室里，我可以聽到醫生、姑娘、麻醉講嘢，有時出現幻覺見到d奇幻野，成個過程有部分時間意識清醒。當手術做完咗姑娘揭開我面布果刻，我問：姑娘，請問我淋巴有冇事呀！姑娘話：咦，原來你係清醒㗎。真係不幸中之大幸，淋巴冇事。

係呢個漫長嘅9個月裡面，特別多謝我家姐、姐夫、姨生仔女，對我不離不棄，照顧無微不至。多謝我家姐係我要放棄時捉實我手，讓我生命延續落去。亦都好多謝熱情好有愛嘅同路人，教我煮野食，提醒我需要注意嘅嘢，教我應對各種副作用。

我仲要多謝阿如為我引荐會長Jacqueline，多謝會長為我排憂解難，仲介紹Ivy我識；更多謝會長為大家建立咗一個咁有愛又有鼓勵嘅group。我曾經因為孤單無助，有兩次係主診醫生同屋企人面前，哭得撕心裂肺，心痛到冇辦法呼吸。但自從入咗《You’re Not Alone》，我覺得我不再是一個人。我唔係一個能言善語嘅人，係group度習慣安靜咁聽大家講嘢；好多謝各位姊妹既分享，令我有更多嘅认知；係呢度我感受到好多正能量，令我對生命、對生活、對未來充滿希望。

感謝緣份，感謝愛，感恩生命！多謝大家用生命影響生命，用愛呼喚生命。如果生命是一條河，我祈願所有姊妹都能夠流向幸福安康的那一端。

漫步人生路我哋一齊加油！