2021最最最後一篇畢業感言-Yu

2021 年 12 月 31 日
姊妹畢業感言

Yu係我喺group到少數既好朋友，佢外表細細粒，好柔弱，但係性格同外表一點都唔相似，佢係一個好細心，好善良，好堅強嘅女仔，我地大家都住東區，所以經常出黎食飯傾偈，我仲好記得你第一針時肚痾，我拎精油比你用，每次出黎食飯，你都買小禮物比我地，我好珍惜同你既友誼啊！睇住你開針，睇住你完成化療，睇住你電療完成，再睇住你完成一年既標靶，好返晒

病時係戰友，病後係老友，我地要繼續定時出嚟食飯同按腳，開開心心一齊到老

**************************

嚟到2021年最後一日，12月31曰，係時候要寫我既畢業文做個總結

2020年29/8手術，28/9開始第一針化療，2021年4/1開始電療，2021年3/10最後一針標靶，我終於完成整個治療。

剛開始確診既時候真係好徬徨，好無助，自己上網搵醫生，真係乜都唔識。

首先我特別要多謝@Jacqueline,真係好感恩有佢帶我入group,另外要多謝@Charmaine 成曰教我地瑜珈，仲咁有心機拍片教姊妹們做復康運動@Ada-活力電兔，正能量滿滿有問必答@Toby,係我地第一次聚會既時候，你鼓勵既說活，真係好窩心@Sandy,成曰分享好多資訊俾我地@Nana,教識我地好多中藥知識@Carman,我既同屋苑姊妹，我地又係同一個外科醫生，同我分享冶療資訊@Wendy,Her2 姊妺，又係同一個腫瘤科醫生，係我開始化療既時候同我分享@Suki,我既同期開針戰友，大家一齊作戰，互相分享最後多謝group入面既所有姊妺，全賴有大家互相支持鼓勵，令我可以走到終點