Ada 畢業文

Ada, 我地2.0既大太陽……我真係要為你去寫返篇特別感言: 好記得有一日Rita話比我聽有個姊妹想加入, 我就叫佢叫你去聯絡我先, 好快你就搵左我, 我地傾左一陣, 當時既你係好down, 好無助, 對自己身體狀況好無奈, 我安慰左你一陣你就好啲, 跟住就加你入我地you’re not alone 2.0, 當時2.0成立唔係好耐, 但你有當年既我咁, 心口有個勇字, 一日……只係一日, 你就由谷底反彈變為一個充滿正能量既大太陽, 當中你有低沉過, 但姊姊們你一言我一語又好快將你抽返上黎, 跟住去到第一針白針時你既副作用超驚人, 我好欣賞你有乜情緒, 有乜狀況都會一五一十咁喺group到分享, 令到我大家明白有狀況會喊會擔心係正常, 因為你平時都好照顧姊妹, 你有事, 全部姊妹都湧出黎去幫你諗辦法, 去安慰你, 我就一直只叫你冷靜, 沉住氣去應戰, 跟住要賽後檢討, 到第二針真係輕鬆多了

今日你最後一針畢業啦, 記得記得黎緊呢2星期都唔好鬆懈呀, 我好多謝你呢幾個月你喺群組入面既幫忙, 呢幾個月我話你要乖, 你都唔嬲, 仲完全聽我話, 今日你得到咁多姊妹既支持同鼓勵係你應得架, 你話過我踢你都唔會走, 會留低幫我, 我同你一齊手拖手拉實啲姊妹一齊走過低谷, 一齊變老. Love you

——————————————————-

打大佬系列之第6針

終於，終於，終於來到最後一針啦

回望翻，依然覺得好似發左一場夢

曚查查咁去檢查，傻更更咁去抽針

仲記得我企係彌敦道一片空白既時候

爸爸拖住我隻手同我講

唔好驚，爸爸會一直陪住你，你一定會無事

成家人會一直支持你

我終於就咁企係到崩潰大喊

2日後終於係一家人既陪伴下確診Cancer

傷心，無奈，再一次大喊

但生活依然要繼續，不停用工作去麻醉自己

跟住係一連串排山倒海既檢查

依然記得每一次等候檢查時個種無助感

檢查後每一次等待報告既恐懼感

個刻先發現原來好多時好多野

去到呢個時候只可以自己一個咬實牙關捱過

原來自己比想像中堅強得更多

轉眼間，確診後第9日

我被推左入人生第一次入既手術室

依然記得係手術室門口同老公分別終於驚到喊出眼淚

其實我真係好驚從此再見唔到屋企人同老公同個仔

9.5小時既手術，對於守係門外既家人係煎熬

因為手術比預期足足長左一倍有多既時間

直到清醒一刻，我感恩自己仍然活著

感恩自己仲可以見到全家人

感恩仲可以拖起爸爸媽媽隻手

向佢地大聲地講 : 我無事啦

手術後第二日，無助到有種想放棄既衝動

去到三十幾歲人，食飯飲水去廁所通通自己都做唔到，全部只能靠人

我真係好驚一世人就要咁過

好彩入左You’re not alone呢個group

令我知道原來呢個只係一個過渡期

令我信心返晒黎，日日努力拉筋，日日努力練習

終於復原得超好，一個月後就打敗左2大傷口

切左淋巴既手舉得直，肚上42cm既傷口好似無岀現過咁，完全可以企直晒

連醫生都讚不絕口，再一次感恩

終於開始化療之路

感恩幸運地遇上2.0成班姊妹

陪我渡過一個個既失眠夜

陪我渡過一個個痛苦既日子

陪我渡過一個個心情低落既日子

有時候真係只有同路人先能夠明白當中既辛酸

好好彩可以認識你地，因為你地既樂觀同堅強

令我終於可以順利完成治療

今日，我終於畢業啦

我終於捱過左呢段有血有淚既日子

我好想係到多謝我屋企人

多謝爸爸媽咪辛苦每3日煲一次湯俾我

多謝家姐俾我做岀氣袋

多謝哥哥每次既分享

多謝你緊張我仲多過自己

多謝You’re not alone成班姊妹日以繼夜既陪伴

多謝你地令我係手術後既谷底游翻上來

多謝你地令我知道跑道上並唔止我一係人跑

最重要係多謝我老公同仔仔

感激你地一直既不離不棄

感激你哋係我發癲時依然默默忍受

感激你哋係我喊嘅時候為我帶嚟擁抱

感激你哋見到我笑嘅時候仲開心過我

感激你哋出現係我生命中陪伴我到老

感激上天賜俾我第二次生命

感激上天賜比我身邊有咁多天使

令我有繼續生存落去嘅動力

從今日開始，我要更加愛惜同珍惜自己

我要學識放低壓力，唔好再迫得自己咁緊

我要學識慢活，唔好再做心急人

我要識得欣賞身邊既人同風景

放下執著的自己，贏的是整個人生

各位姊妹們

希望你地可以擁有同我一樣樂觀既心態

治療並唔係想像中咁可怕

當中一定有苦有甜，有開心有失落

遇到頂唔順，跌低想喊唔緊要

我地都係一個普通人，一樣有喜怒哀樂

最重要失落完識得爬翻起身，繼續努力向前衝

記住你地並不孤單，You’re not alone

呢條路上有無限既人一直係身邊支持你地

大家要有信念，我地一定會打贏大佬，一定會好翻

祝福大家未來既日子健健康康，永遠好運

一齊變老，老左齊齊湊孫

繼續一齊蝦老公

加油加油加油

特別鳴謝

@⁨Rita, BC管腔B2 Yee朋友⁩多謝你帶左我入呢係group

唔係呢半年我都唔知自己點過

@⁨Jacqueline Tong⁩多謝你創辦左呢個group

拯救左一班迷途小羔羊(包括我)

多謝你介紹寬寬俾我，令我全個療程都咁順利

@⁨SandyC-BK BC2A TN⁩多謝你循循善誘，成日同會長講住我唔俾我亂食嘢，又教我點樣舒緩唔舒服，仲成日同我講話愛Ada，

@⁨儀-fb Page BC2 Her2⁩多謝你同我初相識已經對我咁好，咁關心我，好似識左好多年咁，仲送咁多野俾我

@⁨Erica Leung Fb Page BC3A 管腔B⁩多謝你係療程期間一直陪住我高低起跌

我地一齊岀院，一齊見寬寬，一齊開針，一齊打針，來緊仲要一齊電療，一齊食藥，一齊變老，一齊繼續蝦老公

@⁨PY Ng – Fb Page BC 2期 柳醫生⁩多謝你個假髮，仲有一直以來嘅支持同埋關心，仲要冥冥中我哋咁有緣份

@⁨Candy-fb Page BC1-2?⁩多謝你咁錫我，成日煲野比我飲，又咁緊張我，見我痛到咁情願將自己嘅藥讓出嚟俾我食先

太多太多的姊妹不能一一盡錄…….

喺呢度，再同大家講多一次，多謝