Anita既畢業文

2022 年 10 月 19 日
姊妹畢業感言 | 其他分享

Anita, 恭喜你畢業了, 我寫呢段鼓勵文之前, 我再睇一次你既畢業文, 仍然令我熱淚盈眶, 令我想返起幾年前確診時既自己, 令我想起我當時既情緒, 但柳醫生真係講得好岩, 呢個世界冇公平, 但呢個病真係可以令我地檢視人生, 好感恩你收到我教你點樣去面對呢個病同治療, 令到你有團火去面對呢場戰爭, 我呢段時間其實都睇到你好有心咁留喺3.0幫姊妹, 我其實好多次好想多謝你, 真係好感激每一個留守3.0去幫新人既姊妹去減低我同Ada既負擔. 我地對大家承諾過要健康快樂到老啊! Love you!

******************************************

Anita的畢業文

今天2022年9月2日是我最後一天的電療，為所有療程劃上了句號。回想起今年3月頭發現右胸12點有一硬塊，化驗報告證實是癌症，心情一下跌落谷底。果一刻，同好多姊妹一樣，會問點解我會患上乳癌？我自己不煙不酒，生活有規律，個人樂觀，係夜瞓D，無乜運動同埋有時吃得過量，心裏面有十萬個為甚麼？？

之後同事介紹左我去看柳醫生，好快抽粗針及照Petscan，終於來到3月17日看報告的日子，柳醫生說腫瘤3.4cm，有D大，仲要好活潑，當三陰咁處理，仲要先化後術。嘩！當一刻，晴天霹靂，我D眼淚不停流，隻手只捉住我神隊友，D乜乜ER，PR，KI67 完全聽不入耳。我同柳醫生講，點解我生活正常，世界為何不公平，偏偏選中我？柳醫生怎知隨即說，呢個世界是無公平的，不過這個病會令你檢視人生，你在這個病中一定有得著。我依家想番，佢講得好啱。幸運地，他當天已轉介我去看寬寬了。當日下午，在You’re not alone認識到會長，會長Jacquline立即打比我，知道我先化後術，立即同我講左一段好有鼓勵性的說話：「而家佢（腫瘤）放肆在你身體，你怎可以比佢（腫瘤）睬你場？你要盡一切辦法去掃走佢呀！」我突然比呢幾句說話點醒左咁，吾好講笑，心中真是有團火冒起，自己同自己講，為左家人，為左我老公同個仔，我要有勇氣去打呢場仗。2日後3月19日，展開了我的化療之旅。經歷了4紅4白共 8針，八次化療，到6月24日完成，之後做手術電療，歷時5個半月。我非常感激會長，帶我入谷，沒有你，我一定懦弱悲觀，療程不是現在咁順暢。你真是我身邊一位小天使。谷內每一位姊妹都是好叻，好勇敢，感謝大家姊妹無私分享左好多乳癌資訊、經歷及感受，令我不再懼怕孤單，讓我這八次化療越打越順，副作用也不多，仲肥左7，8磅.

感謝Ada，你真是一本活字典，知識豐富，當我們有疑難，你都會一一解答，仲要是秒覆我們。

感謝Cynthia ＆小欣子，你們2位是樂觀小天使，你們的經歷及處理給我滿滿正能量。

感謝三陰谷姊妹，感恩在落針和做手術時，姊妹們都比好多鼓勵。感謝Sandy，記得化療開始時，你同我傾足 I 小時電話，教了我好多方法同食療去舒緩落針後不適。感謝Fion，Kim，Brenda ，同期的Judy＆Joanna，大家互相鼓勵同互呻。仲有好多師姊師妹，感謝有你們陪我走過這段路，大家好有愛。Love You All

治療期間更加感謝家中的神隊友，幫我打左40支升白針，每天工作之餘更要幫手照顧阿仔。阿仔呢段時間也懂事生性，介紹我看「工作細胞」日本卡通，令我更認識人體的細胞。感恩我父母，同事，好友，親戚慰問兼同我打氣；感恩遇上柳醫生及寬寬，他們的專業及謹慎，帶比我無比信心，完成治療。一家人正面樂觀支持，令我在笑聲中度過這段化療之旅。

其實患病後，回望自己對工作及家庭上事事追求完美，同事做不來，比我做，照啃。甚至放假旅行，自己都要set schedule，要有list。今次的病，讓我明白凡事要學懂放下，放鬆，放慢，迎接第二次人生。

恐懼源於無知（會長的名言），抗癌並不可怕，自己走過抗癌這段路，希望同大家分享。祝福各位療程中的姊妹，拿出自己的勇氣及意志，保持樂觀的心，一定可以戰勝這場仗，大家一起加油呀。我們一起手拖手，以後健健康康，開開心心生活到老。