Caca嘅畢業文

之前手痛累積咗好多嘅畢業文都仲未出，而家手痛都係未解決嘅，但係打字都還可以，會嘗試用多啲語音錄音，等自己隻手可以休息吓

今日想將Caca嘅畢業文打吓尖，Caca嘅畢業文會由我去代筆，諗咗幾日寫唔寫好，但係我哋一直強調我哋係手拖手，點可以佢真正畢業而唔出呢篇畢業文呢？

Caca搵我嘅時候，佢已經做咗化療，手術，電療，食緊口服化療藥，電療完冇幾耐就發現有轉移去肺部，但係佢冇放棄過，即刻再做化療加免疫治療，我記得佢曾經同我講當聽到自己轉為四期嘅時候，佢就諗自己係咪冇時間呢？佢同我講喺我哋嘅Facebook page睇咗好多嘅畢業文，大家都好正能量，於是佢繼續心口掛個勇字同癌細胞決一死戰，就算佢唞氣好辛苦，佢都冇放棄，仲問我會唔會有奇蹟，就算佢知道好難有奇蹟，佢都仍然冇放棄，前排仲問我有冇輪椅捐贈，想出院返屋企，幸運地好快有姊妹立即回覆可以送到輪椅俾佢，於是佢喺月頭出咗院返屋企陪屋企人過咗個端午節，之後再入返院，最後好安詳咁返回天家。

Caca嘅先生同我講，你哋都唔好傷心啦，佢自己都早已放下，叫我哋要向前看同埋珍惜眼前人，好簡短嘅一個總結，但係亦都好寫實！

Caca, 你係超級勇士，無畏無懼去迎戰，而家你脫離痛苦，返回天家啦！好好咁嘆世界，我哋天家再聚！