Cherry妹, 我終於等到你畢業啦!!!

2021 年 10 月 26 日
姊妹畢業感言

Cherry真係一個小妹妹咁既媽媽, 佢外表好瘦弱, 令到我都好想保護佢, 記得第一次見你時, 已經好想攬下你, 但識落你原來都幾強, 當中有時會有低落, 但我好欣賞你會講出黎, 等其他姊妹會幫你, 仲有你都會好主動幫其他姊妹, 姐姐我表示好欣賞你呀, 病後你仲同姊妹一齊去學蠟燭導師班, 跟住去左Char既Yoga studio教班, 我見到你地既轉變, 我都好感恩!

所以又係嗰句, 心態可以改變命運, 病左雖然唔係一件乜野好事, 但係只要心存感恩, 樂觀面對, 其實可以係一個機會!!

祝福你以後身體健康, 一齊到老, 記得繼續留守HER2 group幫幫新姊妹呀!!

****************************************

好開心，我今日完成埋電療，大學畢業喇，終於可以寫呢篇畢業文喇

由今年2月25到依家10月26，呢8個月已經經歷過呢世人都無諗過會經歷到嘅事，兩次手術、化療、標靶、電療、食荷爾蒙藥。。正所謂全餐治療，乜都齊晒，因為爸爸多年前患癌時治療情景仲記憶猶新，所以確診後對治療並唔恐懼。尤其入咗You’re not alone呢個大家庭後，簡直信心滿滿

感恩係Facebook遇上好好人嘅Jacqueline，你成立呢個page，真係幫助咗好多人(包括我)，令我認識到一班從來都無諗會認識到嘅姊妹們，每日瞓醒開whatsapp，都覺得好充實

亦感恩呢8個月有唔少姊妹解答過我無數嘅問題，@Ada Cheng 打氣你真係好勁，問咩都會識，會給到人信心; @Kathy @Janet @Kandy @Tracy @Vivian @楊楊多謝你哋係當我無所事事時候同我傾計，解答治療、保險上問題、教扮靚及阿女功課上嘅疑問等，都幫咗我好多 @char @Cannie朋友好開心可以參與你哋教嘅瑜伽及手工皂班過程真係好令人好放鬆

仲有Her2 及大西北gp嘅姊妹，我哋雖然唔係經常見，但感覺一啲都唔陌生，有時仲覺得fd過本身嘅朋友，日日同你哋嘻嘻哈哈咁傾計好開心。

仲有同我pm過嘅姊妹，日後有咩問題盡管問，我明白到當有疑慮時有個人同自己傾下嘅重要性

最後係家人，我真係好好好感謝我嘅家人，從細到大我都唔係啲將愛會說出口嘅人，唔會大大聲跟家人說我愛你或者感動說話，當第一次要做手術時，瞞了媽咪，以為做個小手術就無晒事，點知收到術後報告話係惡性腫瘤，要再做第二次手術，無可能瞞到媽咪，好記得當時面對面同佢講，係喊住咁講，我真係覺得好對佢唔住，要佢再一次承受家人患病嘅日子仲有家姐細佬，本身經營花店已經困身，住院及治療期間成日都要進出醫院，要將小朋友交比佢哋睇住，你哋會帶佢哋去玩，令佢哋時刻都覺得快樂；花店賺嘅錢唔多，但依然義無反顧咁解決我經濟上嘅困難，有你哋做家人好幸福。