Cindy畢業文

第一次接觸Cindy係大年初一既晚上, 當日返左媽咪到食飯, 夜晚上左床睇到Cindy pm我既時侯都好夜, 當時諗不如明天先覆啦, 但下一秒諗如果係自己既話都好想快啲有人伸出援手, 就係咁, 我同Cindy傾左個電話, 一聽到Cindy既經歷, 我心入面同自己講好彩我同佢傾咋, 因為Cindy患左舌癌康復冇幾耐就確診乳癌, 再一次打擊既時候, 都未處理乳癌又懷疑另一邊舌頭又再次有癌症, 結果真係, 真係好好好好彩, 上天又再眷顧Cindy, 再次既舌癌同乳癌都唔需要化療, 又再平安渡過, 相信上次一次又一次幫Cindy一定有原因, 一定想佢好好檢討人生既上半場, 再次認識佢自己, 再大踏步去行人生既下半場, 一定會過得更有意義同更加精彩

恭喜你呀Cindy, 好似你咁講團結就是力量, 喜樂的心乃是良藥, 祝你身體健健康康去走你既第二次精彩人生.

***************************************

Hi 大家好！ 我係Cindy, 17/5終於完成Double cancers嘅治療！因為偷懶，宜家先寫感言。

好多謝Jacqueline，你真係好有愛心，我年初一喺FB搵到你，夜晚晚你都覆我電話，又介紹柳醫生比我，令我個心定咗好多。好多謝組內姊妹們嘅資訊、安慰同鼓勵！要錫晒你哋呀

我係好特殊，上年3月做完右邊舌癌手術，今年2月又要抽左邊舌頭組織（因為有啲痛），點知未抽舌組織，10/2就確診乳癌，真係好驚。點解我又中cancer? 柳醫生知道我嘅擔心，好快安排我於24/2做右邊局切手術。而2/3出乳癌術後報告當日，我再一次確診舌癌，我真係晴天霹靂！人都癲！

呢幾個月，情緒真係起伏，喊咗幾次，自己不斷祈禱，老公同兩個仔及教會弟兄姊妹亦為我代禱，讓我心裏經歷平安。亦好多謝組內姊妹們大家嘅安慰同鼓勵，常常提我一步一步嚟，雖然同期兩個癌症，但感恩係第一期，沒有擴散。感激柳醫生好快幫我做咗手術，2/3於QE再次確診舌癌當日，醫生為免阻礙我乳房電療，所以即刻安排11/3幫我做舌癌手術。跟住就於20/4開始15+5嘅乳房電療。

治療好快就完成了，點解神要我患3次癌症？我未有答案，但我知道往後自己要好好過生活，善待自己，放下無謂嘅執着，改變工作、生活嘅模式，多做運動，學習慢活，愛惜身邊嘅人，有啲事情自己未必控制到，但係可以控制自己嘅心態同想法。

我唔再問點解、唔再怪責邊個，要忘記背後，努力面前，既然好努力面對咗療程，就更加要珍惜生命同健康。要保持心境開朗，雖然對身體狀況特別敏感，但唔好成日自己嚇自己，我要記住「喜樂的心乃是良藥」。希望與姊妹們共勉！