Cold Cap係乜東東?
2019 年 6 月 15 日 Jacqueline的抗癌經歷 | 乳癌資訊與講座 化療要甩晒啲頭髮, 相信大部份人一提起就特別傷心, 我都唔例外, 知道要化療時真係傷心都唔識形容, 但無奈都要接受架啦, 因為根本冇得揀.
直至佢HKIOC見張寬耀醫生後 (我以後稱呼佢為寬寬), 佢一路講解化療副作用, 去到甩頭髮呢到, 見我樣衰衰, 於是佢就講, 唔係冇辦法既………跟住我雙眼發光, 碌大雙眼望住佢, 佢就笑笑口話……女人都係貪靚架啦.
我同張醫生講我認架, 有咩辦法? 佢話HKIOC引入左部冷凍帽機, 係比化療時戴住, 原理係利用個cold cap既凍, 冷凍住頭髮毛囊, 令到化療藥去唔到而另到減少脫髮.
咁可以減少到幾多? 個cold cap又有幾凍? 要戴幾耐? 幾多錢?好緊張咁一連拋出好多問題, 佢好淡定咁答: 甩2-3成啦, 溫度大約10度, 每次化療前要30分鐘pre-cooling, 化完再加90分鐘post-cooling, $1800一次, 我都未答, 好明我既二姑奶話試, 幾多錢都試, 哈哈!
最後我當然做左啦, 每人甩既程度唔同, 我第二針甩得多呀, 但正常會甩到一撻撻同光頭, 我就後腦位甩得多啲, 前面, 側邊, 後下方都仲有頭髮, 咁我整個化療期間都戴Cap帽就OK, 我自己呢, 覺得唔錯, 因為我十分唔鍾意戴假髮, 戴Cap帽出街冇人知我係癌症病人, 精精神神, 特別去做運動同夏天時, 戴帽舒服過假髮好多好多.