Connie畢業文

Connie開始化療時, 因為佢哥哥狀況都唔太好, 我記得當日佢好想去醫院見哥哥, 但因為自己化療中所以去唔到, 好難過, 姊妹們不停幫佢地搵檢測地方, 希望阿嫂盡快可以見哥哥, 但哥哥最終等埋妹妹做完化療先走, 睇得出佢地感情好好! 哥哥一定喺彩虹橋守望住你一家, 將來一定有機會同哥哥團聚架!!

其實睇得我地姊妹既畢業感言多既, 都睇得出我地姊妹間手拖手一齊行, 大家由大攬都扯唔埋, 變為戰友, 喺最艱難既日子日日吹水, 甚至有啲變為好朋友, 希望呢份愛可以延續落去!

Connie, 祝福你身體健康, 開開心心, 畢業前係戰友, 畢業後就係朋友, 繼續手拖手到老

**********************************************

各位姊妹，我想頒個獎俾自己，因為我今日完成最後一次電療！

由三月初確診到而家，手術，化療，電療，日子真係唔易過。好多謝@Ada Cheng 帶我入group，多謝會長 @Jacqueline Tong 成立呢個group，好多謝你哋個個有問必答，感激你哋冇嫌棄過我喺化療同電療期間係個group到求救，埋怨辛苦，讓我們從互不相識嘅陌生人，變得好有bonding 嘅姊妹。有同路人嘅陪伴，確實係一份幸福

有啲姊妹都知道，我哥哥都係cancer，係呢兩年幾，我同佢並肩作戰，好可惜佢係我治療期間，離開咗呢個世界。雖然我趕得切同佢道別，看着佢呼最後一啖氣，但佢嘅離開令我心情跌到落谷底，我曾經都會質疑自己醫唔醫得好，究竟生命嘅意義係乜嘢。。。原來有病並不可怕，有病無得醫才可怕。原來死並不可怕，痛才可怕。原來我們可以做手術，有藥食已經好幸運。

重生之後，我希望自己可以學識更加錫自己，學識放鬆心情，學懂愛得及時，同你地一齊健康活到老！