Cynthia畢業文

首先我好感謝Cynthia, 佢病後都繼續留守3.0去幫新既姊妹, 佢好多病後既睇法都同我好似, 所以佢既正能量幫到好多好多既姊妹, 有好多姊妹PM我話好鍾意Cyn, 因為佢既正能量同埋真心感染到好多姊妹.

Cyn, 你既抗癌旅程絕不容易, 但係你既正面樂觀, 真係幫你不少去抵抗副作用, 繼續發放正能量, 幫我手繼續幫更多既姊妹, 我祝福你健康到老

**********************************************

終於畢業呀))))))

回望上年12月我做完一個小手術出院前， 諗住叫醫生摸下我個胸果舊係咩， 因為唔洗錢嘛， 點知佢個樣已話比我知大鑊， 佢好緊張0甘幫我安排照超聲波， mmg , 抽針等等， 16/12 抽針醫生已即時講係衰野， 我行出診所係夜晚， 拖住老公， 全身震晒， 喊唔出， 只係識流眼淚， 返到屋企， 我平静落黎， 我問老公， 如果我揀兩邊都唔要佢介唔介意， 佢第一句係叫我冷静d, 唔好衝動， 但佢亦講， 條命緊要， 我可以做任可決定佢都支持。

之後我上網揾到Jacqueline 會長， 佢超快覆我同加我入group, 我初時唔知乳癌分0甘多種， 傻吓傻吓唔知其他人講咩， 一舊雲0甘，但佢地既關心比到我信心向前行。

再之後既幾日我揾左d朋友講， 每一個都叫我唔好亂黎， 直至我第一次見我外科醫生羅杏斯醫生， 我只係一邊乳房有事， 我同佢講兩邊都唔要， 唔重建， 我唔怕人地點睇我， 佢當場舉起手指公比我， 跟住佢話好， 我果吓差d喊左出黎， 佢係讚成果個亦係唯一讚成果個， 過程中佢對我既照顧我超感恩有呢個醫生做手術，手術後要睇腫瘤科醫生， 羅醫生介紹曾憲玲醫生比我， 第一次見就問我係米羅醫生朋友， 因為羅醫生已同佢講左好多次要睇實我， 羅醫生對我既關心真係非一般醫生會做，我8針化療， 第一第二針出晒事， 但問題係我本身， 唔關其他人事， 所以係呢個group 我係異數果個， 我唔會怨我遇到既任可事， 因為我一心要向前衝， 我要生存落去， 我要同老公再去旅行， 我要做我想做既野， 我唔要輸比個病， 所以療程中有幾辛苦， 有幾痛， 我都笑住過， 感恩Ada Cherry, Sandy, 仲有好多好多姊妹既幫忙， 由我咩都唔知， 到我都知道點對付所有反應。

回想呢半年既生活， 真係好快過， 經歷4個月做3次手術， 經歷化療， 經歷電療， 時間好快就過左， 真係好感恩我有幸遇到Jacqueline會長， 佢同呢個group就好似救命草0甘， 係我須要既時間佢地扶我一把， 我以後會盡力做其他人既扶手， 因為我太明白有人扶果種感覺係幾感動， 幾有力， 我唔敢講我會做得好好， 但我一定盡力幫以後有須要既姊妹同行。大家加油， 終點在前。