Fion 畢業文

Fion係三陰性乳癌，初初因為腫瘤得8mm，係好樂觀既一期，通常一期唔洗照pet scan, 但係Fion就係呢個例外，做手術時先發現淋巴有感染仲去埋骨，呢個過山車實在太難接受，由一期變三/四期，試問點接受？當時既Fion直頭失去晒方向，姊妹要call我幫手安慰Fion, 大家講過手拖手就一定會拖實Fion, 一齊諗辦法，一齊去面對 沉住氣，一步一步行，睇多個醫生，再慢慢行，今日你大學畢業啦，好感動呀！

Fion, 記得要多謝你自己呀，一路以來自己冇放棄過自己，今日嘅成績表，係你堅持返嚟㗎，你值得擁有，你既分享幫到好多姊妹，祝福你身體健康，平安喜樂，繼續手拖手到老

*******************************

今天完成最後一次電療，終於可以發表感言了。

由上年八月在廣華醫院做婦科普查發現有問題，到九月抽針確診乳癌，之後的手術，化療，電療，好多嘢都好似上個月發生，好多情景都係腦海中一一湧現，當然心情起伏好大，由當初確診一期，變三四期，真係好似坐過山車，由好驚變成擔憂，緊張，懷疑，絕望，心情非常複雜。

因為我每年有做檢查，而且我嘅腫瘤得8mm，所以醫生認為係一期，所以只做超聲波檢查，26/9 手術嘅時候，發現前哨淋巴已經感染，醫生幫我切了兩組淋巴。記得手術後每次有報告見醫生，醫生都話情況冇預期咁好，又會叫我再做另一樣檢查，而每次姑娘打電話叫我提早覆診都令我瞓唔到。後來先知自己嘅乳癌叫三陰。

好在我喺網上見到Idy 和會長嘅網頁，好幸運佢哋差不多時間搵我，仲帶咗我入谷。入到黎係我嘅幸運，得到很多資訊和鼓勵。

我記得我喺十月十八日入群組，十九日收到正電子掃描報告，第一次見腫瘤科醫生，收到一個好震撼嘅消息，就係話我的骨着燈，已經係晚期。醫生要我再入醫院做磁力共振同抽針檢查，嗰刻我覺得好攰，個腦一片空白，個頭好痛，醫生叫我做乜，我只有跟着做，腦唔識得運作。

返到屋企仲要同我仔女講我嘅病情，雖然自己好攰，但係仍然要照顧仔女嘅情緒，安慰佢哋。

夜晚我喺三陰群組話俾姊妹聽醫生話我晚期，姊妹仲安慰我，叫我振作，不要放棄，叫我睇多個醫生。我記得我話我連見多個醫生嘅力氣都冇，而會長亦都係因為咁而入咗三陰群組安慰我。

多謝會長，雖然已經好夜，仲不斷苦口婆心叫我睇多個醫生，攞多啲意見，介紹我去見寛醫生。我見完寬醫生之後，醫生嘅樂觀感染咗我，他話我嘅病吾難搞，仲好有耐性答晒我嘅問題，令我對前景有一絲希望。幸運之後入院做磁力共振骨冇事，雖然其他地方有擴散，但係我已經充滿信心面對嚟緊嘅治療。

11月開始在瑪麗醫院做化療加免疫治療，雖然每星期一針，感恩副作用並不算嚴重，我亦有胃口食到野。

直到一月，我肝酵素突然飆升，醫生要我暫停化療，入院檢查。

原來免疫治療影響咗我嘅肝，所以我要暫停化療，醫生提議我再做正電子掃描，發現化療效果對我很好，我所有衰嘢完全冇晒，於是再做第二次手術，術後報告一切正常。今天終於完成25次電療。

這段期間，要特別多謝會長，係我最絕望嘅時候，不斷為我打氣，又介紹好醫生俾我。

多謝 Idy，係你帶我入群組，多謝你接受訪問，幫到好多三陰病人。

多謝 Ada，你係我哋嘅開心果，每次姊妹遇到問題，你都會解答大家嘅疑問。如果唔係你，我都唔會喺群組分享自己嘅心事，亦都係你話俾我聽，有嘢唔開心可以喺呢度講，大家會陪住我。

多謝 Sandy，你分享咗好多資訊俾大家，我哋三陰嘅姊妹，你都會關心。一啲少出聲嘅姊妹，你都會問大家嘅近況，感覺好溫暖。

多謝 Celine，你嘅分享係一支強心針，好多謝你。

多謝 Char ，多謝你拍咁多片教大家做運動，我都有跟你做。

多謝大家，每一個訊息，都陪伴我治療，雖然係醫院要等三四個鐘，但我都唔覺得悶，因為有大家陪我傾偈。

我亦都要多謝我屋企人，喺治病期間，佢哋陪我一齊行每一段路。尤其我老公，每次我想出街，佢都會拖住我陪住我，相信係呢段期間，家人一啲都唔好受，不過我已經冇事，相信佢哋嘅心情都輕鬆返。

多謝我姑仔，有幾次過嚟我屋企幫我煲湯，又會醃定一啲餸和她種嘅有機蔬菜比我老公帶返屋企。

多謝我幾個教友和朋友，多謝佢哋為我祈禱，多謝佢哋嘅陪伴和問候。

我仲要多謝所有睇過我幫過我嘅醫生和護士，每一位醫生都係盡力幫忙，希望比到最好嘅治療我。

治療中嘅姊妹，而家雖然係好辛苦，但係時間好快過，好快就捱過，好快就冇事，而家嘅辛苦，係為咗將來行更遠嘅路，經過今次，大家都要珍惜自己嘅身體，以後都唔好比自己咁操勞，我哋好好享受以後嘅生活，因為時間實在太寶貴。

我送大家一首歌，係張衛健嘅身體健康，我係治療期間在收音機聽到呢首歌，我覺得歌詞形容到我當時嘅心情，每次聽到都不期然流眼淚。

當然唔係想大家流眼淚，而係

希望大家身體健康，每天開開心心，大家一齊到老。

我不要做弱質病人　變一個負累你不幸

誰想有病　厭惡呻吟　我不要千金百銀

也祈求這小小的福蔭

我只想　身體健康　要活到過百歲不需枴杖都可跟你相擁

不忍你勞碌的照料我　受了這種切膚之痛