HER2,要化療


今日返柳醫生到覆診,諗住未咁快有報告,點知臨走佢突然話報告出左,點知…………宣布係HER2,要化療😔😔

第一個感覺-甩頭髮😭😭😭

同病友分享,大家對甩頭髮都係最傷心,最難過,最不安既感覺,反而覺得化療辛苦係預左。

我忍住啲眼淚聽醫生講,跟住醫生一離開我啲眼淚就不受控地流出黎。無厘頭有乳癌已經夠震撼,要做手術捱痛又已經做埋,仲要我甩頭髮?我又冇做錯事,我對人好,我孝順父母,自問係一個好妻子又係一個好媽媽,點解個天咁對我呢?心入邊既憤怒又不解又擔心又恐懼,眼淚不受控地流落嚟。老公一直係我身邊冇出聲默默咁支持我,當我喊到一張紙巾濕晒,佢再比一張我,再濕佢又再同我換,天啊!我點算好呀?

喊左好耐,個人終於定左落嚟,於是即刻搵我之前喺網上面識左個朋友,佢case同我差唔多,腫瘤差不多,size期數一樣,但係佢唔需要化療,我一直都以為會同佢一樣,做完手術跟住電療就完啦!事與願違,我呢個係HER2, 因為佢係屬於惡嘅腫瘤,所以一定要接受化療,係呢個時候,佢話佢有一個WhatsApp group,全部都係乳癌嘅姊妹,於是佢將我加入去,呢個group叫重新出發聯盟,嘩!個名好有意義啊,一入去,各位姊妹非常友善去安慰我,解答我所有唔知道嘅情況,令我好快好快接受左現實同埋安心左好多!

PS: 如果你不幸患上乳癌,好無助,可聯絡我,我可以將你加入呢個group到架!

分享: