Jacqueline 近況 – 2021年11月9日

好耐冇update自己情況, 唔知大家有冇記得之前我話唔舒服要休息一下，我就係等埋呢個報告先一次過update大家, 自從上年年尾轉左AI後, 今年簡直玩謝左我, 連我呢個大太陽都不禁懷疑人生

– 周身唔聚才

– 周身骨痛

– 口腫面腫身都腫埋

– 重左十磅但脂肪冇重過

– 個人又好攰

– 瞓得唔好

– 感覺成個人都唔順

咁都要解決架我好積極既, 去睇中醫啦, 中藥+針灸, 謍養師, 跌打, 腫瘤科, 外科, 家庭醫生, 物理治療, 連自然療法處理下情緒都出埋, 可以試既我都試晒, 咁大個女未試過一年睇左60次醫生 最慘係做左咁多野都係徒勞無功, 以上既唔舒服仍然繼續, 控制飲食到懷疑人生都唔輕, 仲要有個血指數APL唔合格, 初初我仲沉住氣同自己講處理下情緒先, 再做埋運動, 或者跟住所有野都會正常返, 結果係冇, 仲要做運動做到壓到神經線, 條腰痛到著褲都著唔到, 個APL驗左5次都係唔合格, 呢個APL係關於肝或骨, 最擔心既係肝或骨轉移, 寬寬8月時就叫我照PET, 但係我上年12月先照完, 唔想又照, 所以就比少少時間自己處理下, 點知連柳醫生一向反對我照PET既都叫我照下穩陣!

好啦, 原本我book左12月照就提前少少照左先啦, 結果…………冇事安樂晒, 今次仲照埋MRI腦, 怕自己唔怕一萬, 至怕萬一, 反正都做就唔埋佢啦, 感恩感恩!

呢段時間肥左呢十磅, 我超級唔喜歡, 但既然係藥物影響, 我都要接受, 接受左後, 我覺得個人開心左, 初初為左呢十磅真係出盡法寶, 又營養師又做運動, 一星期快步行3-5次, 每次7-10K, 再控制飲食但都完全唔落磅, 唔知係唔係天父知道我好介意比人話我肥, 要我學習放下呢? 後來我同自己講, 咁樣唔掂架喎, 你減肥就黎減到抑鬱, 咁如果係藥物影響, 你都改變唔到架啦, 咁不如接受佢啦, 之後我就正常飲食同埋kep住做運動, 結果係冇輕冇重既 咁好啦, 我就維持幾年做個小肥妹 (我仲未好肥既)

PET報告冇事, 我就當自己冇事架啦, 可以做既就係繼續做運動, 繼續開心, 繼續佛系, 繼續定期檢查, 繼續定期抽血, 繼續以生命影響生命, 繼續幫人, 繼續為姊妹謀取福利, 繼續繼續乜都好啦, 我會同粒AI副作用共存, 共勉之!!!!

岩岩收到一個岩岩入左group既姊妹pm: Group 令到未做過化療/電療/鏢靶既我無咁徬徨驚恐..多左好多正能量..有時見啲姊妹講到好輕鬆咁，心情都冇咁擔憂。

大家繼續加油呀