Jess畢業文

Jess, 睇到你204日既過程，真係好唔容易，請先比10個叻叻自己，完成後當回望返, 其實唔係咁難, 當然中間有擔心, 有辛苦, 有無助, 但我地group就係因為種種而存在著, 要記住大家互相幫忙先可以走到今天

恭喜你完成晒治療，好返晒架啦，難得喺呢到識到班戰友，我地要繼續手拖手健康到老呀

******************************************

畢業了

各位姊妹我終於都畢業了，由確診到經歷手術化療電療總共204日，我發覺原來自己一啲都唔簡單

回想起當日有一晚沖涼摸到自己左邊胸好似有一粒嘢，個心就有啲囉囉攣，因為我媽咪30年前曾經有過乳癌不過已經康復了，所以個心其實有少少擔心的，第二日就即刻求其搵個女醫生，佢都有寫紙比我去照，但係因為嗰排係除夕嗰啲日子，所以嗰啲期都要排成個幾兩個禮拜之後，跟住我又好鬼心急去咗醫院搵第二個女醫生佢即刻安排到俾我照，跟住31/12睇報告，到咗睇報告嗰日，醫生同我講係一啲唔好嘅嘢，我嗰一刻其實接受唔到但係又要保持冷靜，因為我好似仲有好多嘢要處理，而又因為公司保險嘅問題所以醫生幫我安排咗即日住院之後再見乳房外科醫生同埋做其他檢查，上年除夕我就喺醫院自己一個人渡過，我仲記得嗰晚約咗去朋友屋企玩

到做晒所有檢查做埋局部乳房切除手術其實成個過程喺10日之內，我好似發咗場夢咁，完全唔知做咩事淨係知自己確診乳癌，嗰一刻對乳癌仍然係好少嘅知識，到梁醫生黎同我講我係屬於三陰性乳癌，我嗰刻爆喊了，因為喺住院嗰幾日我都有上網係咁以睇吓啲資料，淨係知道三陰性乳癌好難醫，亦好容易復發，我個女只有三歲，之後條路應該點樣行呢？個腦已經實晒諗唔到嘢

估唔到我出咗院第一件事竟然係去買假髮（原來我都有啲貪靚）跟住喺屋企休養嘅時候就係咁上網搵下資料，有朋友介紹咗我認識you’re not alone group, 又睇咗姊妹Idy嘅page，之後我膽粗粗inbox 會長，佢邀請咗我入group, 認識咗好多姊妹，亦都多謝佢哋介紹咗寬寛俾我，寬寬係一個可以比到我信心而又令我好放心去睇嘅醫生. 一切都好感恩

當然喺化療電療期間都曾經有過一啲緊張同難受嘅時刻，例如等BRCA報告啦，疫情最嚴重時去政府化療，自己一個人打晒30針升白針，由紅針轉白針攤咗喺張床到郁唔到，化療尾針生蛇（我覺得最痛苦係呢度，因為我成塊面腫曬，隻眼都打開唔到睇嘢）但原來一切都會過去的，好彩我係呢個group，得到好多資訊，就算痛捱過了就好，我仲記得我返寬寬度抽血，姑娘話我好開心，我話係呀因為我好想快啲完成療程

到咗今日終於畢業了，我要多謝會長拉咗我入group，多謝Sandy打俾我分享咗好多資訊俾我知，又多謝同期姊妹嘅互相鼓勵，特別多謝Ada, 係我生蛇最需要幫忙嘅時候幫我搵到寬寬

回想起點解有呢個病我相信係因為情緒方面，因為係個女出咗世之後我成日都同我老公鬧交，個女又成日激到我扎扎跳，希望係我重生之後，我可以keep住提自己放鬆啲放鬆啲

最後我要再一次多謝you’re not alone group, 因為同路人嘅支持好重要，因為佢哋好多時候比自己屋企人更加明白自己，雖然已經完晒療程，但係我知道唔可以鬆懈，要勤力啲做檢查，各位姊妹雖然醫治乳癌呢條路唔容易行，但係我哋手拖手一起走我哋一定會好返的加油

喜樂的心乃是良藥