Karis 畢業感言

Karis好好彩，佢唔洗化療，手術後只需做電療就ok, 但初初確診時，因為一聽到個癌字已嚇得半死，加上唔知前路係點，越諗越恐怖，雖然Karis唔洗做化療，但佢加入左2.0後見到師姐們要做化療都可以咁勁，令佢都好正面就完全晒治療，恭喜你呀！以後要健健康康呀

******************************

各位姊妹，今日到我畢業啦！衷心多謝會長喺我最徬徨無助嘅時候加我入呢個咁溫暖嘅group！

記得由我摸到胸有粒野嘅第一次已經覺得唔係好嘢，跟住第二日即刻book 夾胸照ultrasound, 一路照一路震好驚好驚，問幫我照嘅醫生都唔肯正面答我係咩，個心果刻已經跌落谷底，本來10/11去照姑娘話應該一星期左右出報告，點知過兩日就收電話叫我黑色星期五13/11上去抽針，喺公司已經喊左出嚟，喊到去抽針果日眼涙都係不停咁流，仲記得呢日仔女考完試book 左陪佢哋同埋同學去迪士尼，抽完針要扮到無嘢咁同佢哋玩，跟住捱過咗果個星期六日一，到星期二收到醫生電話叫我19/11（我老公嘅40歲生日)帶埋屋企人上去睇報告，我喊住問姑娘係咪衰嘢，佢話唔使擔心有得醫嘅，果刻已經喊到坐喺地下，喺呢幾日我好無助同絕望，好驚唔知D仔女點算，點樣話俾佢地知，就上網揾資料睇，無意中竟然喺好耐無睇嘅BK見到會長，會長好好即刻PM 我叫我whatsapp 傾，好記得睇完抽針報告會長好好，好記得會長安慰我解釋俾我聽同我講You’re not alone, 呢一句真係好窩心，之後我加左入group有更多嘅同路人分享，令到我真心感到I’m not alone!

喺呢個group我唔會再驚，知道手術喺點，電療會點，食荷爾蒙藥又會點，你哋個個都好好，好真心咁為大家好，互相幫助互相扶持，我friend 同我講你呢個係小病是福，因為我得到好多人嘅愛同關心，就算一班素未謀面嘅你地都可以令我覺得好warm, 呢個病令我學會要愛惜自己，感恩身邊人對我嘅好，知道有咁多人愛惜緊張我，今次係一次重生嘅機會，希望以後我哋都愛自己多啲，感恩身邊嘅人多D，咁樣就大家都會好開心，多謝咁多位姊妹，原諒我咁夜咁長嘅畢業文，祝福我哋以後都健康平安，一齊拖手行到老