Katherine畢業文

😭😭😭開心既眼淚，睇到你既畢業文真係好感恩，好感動，我曾經好擔心你既case, 用曾經係因為見你情況越來越好，亦好多姊妹拖實你，我就用心力去照顧其他人，我亦知道你有同我一樣以生命影響生命去扶助其他姊妹，有時我覺得天父點解派比每個人唔同既功課，有啲難啲，有啲淺啲，可能係佢覺得要夠力先會令佢明白點樣去愛自己，你領悟到佢既旨意了！以後要記住好好愛自己，過一個更精彩既第二次人生😘😘😘我哋一齊繼續手拖手健康到老🥰🥰🥰🥰🥰

*************************************************

終於到我呢位四期姊妹寫畢業文了，此刻除了感恩，還是

感恩！❤️

確診乳癌

確診乳癌前，我係一個好執著嘅人奶雙職媽媽。大女食人奶食咗兩年，我好執著地要”公平”對待現時兩歲半嘅細仔，想俾佢食兩年人奶。無論工作幾忙，我都堅持喺 office pump 奶，有時仲邊pump 邊大力按壓，務求喺十分鐘內pump 到最多。直到上年九月，我覺得右邊乳房有點脹硬，奶量少左邊好多。我以為係塞奶，揾通乳師幫忙卻不果。既無知又繁忙嘅我覺得又唔痛又無發燒又唔影響生活，決定唔理佢，繼續沉醉於工作及照顧仔女。

直到兩個月後，乳頭有血流岀，去睇乳腺科，做完Ultrasound 之後醫生馬上安排抽針，照 Pet Scan, 最後確診三陰性乳癌四期，已擴散去骨多處。之後八個月，我經歷咗8次化療、雙乳全切及重建手術、25次電療。

遇上天使。多謝會長

得知壞消息後，一直好獨立、覺得自己咩都搞得掂嘅我突然被殺一個措手不及，心裏極徬徨和迷惘，覺得自己好渺小又無知。我合起手禱告，祈求我主耶穌引領我，醫治我。感謝主聽我禱告，在我失眠睇 Facebook 時，揾到 “You’re not alone” 嘅 page, 睇到師姐們寫嘅畢業文，頓覺得有一點希望，彷彿就好似有人話俾我知我個病係有得醫㗎！睇晒所有Posts後，我聯絡會長@Jacqueline Tong，會長好快覆我，同我講咗個幾鐘電話，話俾我知下一步應該點做。我仲好記得會長同我講「唔好太擔心，幾多期都係咁醫㗎！」嗰一刻簡直覺得自己遇上天使，為我照明。我鼓起勇氣，跟住會長嘅指示一步一步開始去醫病。會長知道我好快開始化療，無時間做足準備，就親自送帽和痱滋膏過嚟俾我，簡直係雪中送炭。多謝會長拖番我起身，讓我有力氣一步一步向前行。多謝妳成立 “You’re not alone”，讓我哋不孤單地走過最艱難的時候。❤️

恐懼來自無知。多謝各位姊妹

會長亦同我講過「恐懼來自無知」，我不能同意更多。入到 You’re not alone 3.0 和三陰群組，有好多姊妹同我分享經驗：各項治療會岀現嘅副作用、點樣 “見招拆招”、治療期間嘅大小問題，姊妹們都好有耐性一一解答。我喺好短時間內得到好多好有用嘅資訊，我唔再感到恐懼，因為姊妹們令我認識多咗乳癌，我對前路唔再係無所不知。當然亦唔少得心靈上嘅安慰，群組裏面好有愛，姊妹們互相關心，互相支持，佢哋會記得我幾時做手術，幾時睇報告，適時為我打氣。

多謝各位姊妹，你哋嘅熱心帶給我很多正能量，推動我不斷向前行！特別要多謝Sandy, Ada 和 Jessica，你哋嘅資訊和建議幫我”拆咗好多招”，讓我治療非常順利，化療也可正常生活。多謝同期姊妹Anita

Ceci，妳哋嘅關心同支持令我好温暖。❤️

心態決定一切：常存盼望、喜樂、感恩

治療期間，心態好緊要，你想壓住個病？定俾個病壓住你？人生不如意事十常八九，所以我無執著去諗「點解我會有哩個病？」反而我好感恩我有哩個經歷，讓我有時間去細數天父賜我嘅恩典，去反思。以前嘅我俾自己好大壓力，好想喺每個角色中做到最好，返工要付出120分嘅努力，亦覺得做媽媽要為家庭犧牲自己，成日將自己放到最後。患病後，我明白到要愛人，先要愛自己，如果我再唔顧好自己而因呢個病返天家，仲點去照顧我嘅家庭？我亦明白到煩惱、憂慮好多時係來自自己嘅睇法，當我唔再執著，開始以謙卑嘅心接受各樣事情的不完美時，我發覺原來我已擁有很多，天父賜我嘅恩典真的夠用。

長達八個月嘅療程轉眼就過，治療期間，我大部份時間都好開心，因為我感受到好多好多嘅愛！我要感謝我老公、父母、工人姐姐和各地嘅親友，喺治療期間俾我無限無私嘅愛與鼓勵，照顧周到，關懷備至，岀錢岀力，讓我可以安心休養。仲有我嘅上司、同事、好多朋友、教會嘅弟兄姊妹。。。數之不盡，我真係好幸福！

我亦要多謝我自己，同自己講「辛苦哂喇，好好錫住自己，享受第二人生！」

最後，感謝主賜我不一樣嘅平安，看顧我。願榮耀和頌讚歸與祢！🙏🏻

(PS: 想提醒打算餵人奶嘅媽媽，坊間成日話餵人奶可減低患乳癌風險，可能會令我哋對乳癌警覺性低咗。餵人奶時如覺得腫脹，要盡快求醫。)

#乳您一起youarenotalone

#乳您一起畢業感言

#化療經歷

#以生命影響生命