Ling 的畢業感言

2.0有個傳統，每個姊妹畢業都會發一個感言，我仲好記得Ling第一針發燒，我地好似打仗咁商量去唔去醫院，call醫生，搵屋企人幫你照顧小朋友，再觀察，跟住成功激退發燒，呢啲情景仲好似好近既事，睇住你越戰越勇，眨吓眼就畢業，好感恩你堅強地走過了，你好有智慧，明白到以後都要愛自己先，加油呀！期待見證你既二次人生

Ling嘅畢業致詞：

由我6月18日沖涼摸到硬晒嗰一刻，直至到我6月29日睇醫生確定真係有硬塊，7月2日安排照3D 乳房造影同時間抽粗針，7月4日報告顯示高度浸潤性導管癌，仲記得聽報告嘅時候，一邊聽一邊流眼淚，眼淚係不由自主地落下，心諗點解偏偏會係我？？因為冇家族遺傳，並且我冇服用長期避孕藥嘅習慣，而且我兩個仔我都有餵母乳直至到他們一歲半及兩歲，為何上天偏偏選中我？？腦袋真係出現10萬個為什麼？？幸好我個主診醫生安排咗個快期俾我入法國醫院做手術，仲記得7月16日入院準備，7月17日一早就落手術室，心情既緊張又擔心（因為我係左邊全乳切除），唔知手術後嘅自己會唔會覺得好難看？？左手腳活動能力究竟要幾耐復原？？心裏面充滿好多疑問⋯⋯而且身邊又冇人可以解答我，當時我就不停上網搵關於我同類病情手術後嘅相片去安慰自己，與此醫生有講過我手術後可能要做化療，我又上網搜尋做化療嘅資料，心內都有很多不明白嘅地方，而又唔知道係揾咩人幫助⋯⋯出院之後見過第一個腫瘤科醫生，佢處方比我食嘅荷爾蒙藥又令到我有生滿面暗瘡嘅副作用，做咗Oncotype Test 又唔知結果會係點，究竟化療過程係點？自己頂唔頂得順？

幸好8月3日我喺Baby Kingdom見到Jacqueline嘅post，之後喺Facebook睇到佢嘅Page, 好快就PM佢加咗我入呢個You’re not alone嘅大家庭，入咗group之後，見證住唔同姊妹嘅分享，先知道原來化療過程一啲都唔可怕，從而令到我更加有信心打贏呢場仗⋯⋯化療三針期間，真係有苦有甜，慶幸各位姊妹嘅支持，有你哋嘅鼓勵說話真係差好遠，每一句嘅鼓勵說話都係我嘅強心針，因為同屋企人分享佢哋唔會明白我嘅感受、亦都唔會明白化療有幾咁辛苦⋯⋯

由第一針8月26日到今天10月28日我終於畢業了，之後仲要食5至7年半嘅荷爾蒙藥，但我相信上天賜我第二次生命，係希望我更加珍惜現在、愛自己多一點才有能力愛家人、慢活人生

特別鳴謝：

會長Jacqueline（多謝你由我一個迷失嘅羔羊帶我入咗呢個大家庭）

多謝Icy 喺初初我入Group 嘅時候PM我資料（教我做復康運動）

多謝Ada （見證住我第一針同第四針畢業）

多謝Candy Tam （係我最徬徨無助嘅時候拉返我入光明嘅道路）

其他各位姊妹實在太多太多不能盡錄（請見諒），好慶幸自己入到呢個大家庭，大家要一齊健健康康、一齊打勝仗、一齊變老

記住：You’re not alone