Queenie既畢業文

畢業文唔一定要做晒化療電療先算, 只要你確診過, 其實經歷既心情都係一模一樣, 當中既過山車心情真係只有同路人先會明白.

恭喜你呀Queenie, 恭喜你相信我去見柳醫生, 恭喜你柳醫生幫你做左個令你都好滿意既手術, 恭喜你手術完成後唔需要化療電療, 恭喜你明白到呢次得來不易既幸運.

祝福你以後要健健康康, 開開心心, 活在當下咁走你既第二次生命, 我地繼續手拖手到老呀!

**********************************************

昨天睇完柳醫生醫生同埋寬寬，研究完病理報告，佢哋建議唔使化療電療，只需食五至十年嘅Tamoxifen,我唔知道我算唔算係畢業但係我都想喺呢度衷心多謝大家:-

首先我要多謝Ada，佢係我最徬徨無助嘅時候分享佢做手術嘅情況復康之路，並將我加入這個群組，佢一路走來並不容易但係佢勁正面樂觀，帶給我無窮嘅信心而且每次有疑問都秒速即回，使我一步步明白怎樣治療同面對

另外我真係要多謝會長Jacqueline，佢一知道我睇完兩個醫生仍然心有不甘，好想為自己作出一個不後悔的決定，佢介紹咗一個好好嘅醫生給我，柳醫生每每都係從病人角度出發，將傷害減到最少將疤痕做到最靚最完美，連昨日寛寛為我檢查傷口和重建嘅時候，都不斷讚嘆多謝你創立這個群組使我哋迷途小羔羊，不再孤單勇敢面對

仲有多謝Nat, 喺呢度遇上我嘅小學同學，我初時對病情並不明白，比起我，原來你的情況不易行，但仍每日每天仍關心我安慰我，分享無窮無盡嘅資訊。你仲有兩針化療同電療，希望副作用遠離你我相信你一定會跨過，我哋快啲出嚟見面

最後多謝你哋每一位，尤其曾經喺度解答過我問題私訊我嘅姊妹，你哋係我黑暗中嘅小天使，你哋每一個分享都令我明白了解多啲自己嘅情況，好好行每一步

最重要嘅係我感謝天父雖然疾病是可怕，但佢嘅恩典帶領使我從死蔭幽谷安歇在青草地溪水旁，得到了第二生命

喜樂的心乃是良藥-箴言17章22節

祝福大家永遠都平安喜樂