Regina畢業文

終於到你啦, 每次見到你地畢業文, 我都好感動, 因為又多一個喺我地group既姊妹畢業, 雖然入group既多於畢業, 但我相信呢到每一個姊妹都一樣有好深刻既感受, 而呢份感受, 相信永世難忘, 今日我地拖實你, 他日你都可以成日拖實新姊妹既人.

叻女呀Regina, 好多謝你既分享化療中既經驗, 每一個畢業文都可以比到新確診既姊妹一分鼓勵同動力, 亦令佢地睇到化療其實冇想像中咁可怕, 絕非廣告先令到信服, 好感恩你有覺醒, 然後做個開心快活人去行你既第二次人生, 我地一定可以走過, 我地繼續一齊加油, 手拖手健康到老啊!!!

***************************************************

每次見到有姊妹嘅畢業論文都好期待自己出po呢一日, 今次終於到我啦! 上星期五終於完成埋電療，我畢業啦！

記得上年7月中照mammogram同超聲波後, 兩位醫護都面露難色, 叫我報告一出要快啲睇醫生, 個腦即時諗起老公同兩個女, 當場喊咗出嚟, 佢哋好好咁攬住我安慰我, 話唔係最worst嘅, 有得醫嘅, 唔好咁擔心. 幾日後, 喺迪士尼玩玩下收到護士電話叫我儘快去拎報告, 最後喺8月初確診。

有咗所有報告後, 外科同腫瘤科游醫生提議我先化後術。同大家一樣, 面對化療充滿咗好多惶恐擔心, 所以上網search, 俾我睇到You’re not Alone嘅FB, 所以就PM會長 @Jacqueline Tong 問下化療有咩要留意, 會長主動叫我入group同姊姊傾下, 而且仲介紹 @SandyC-BK BC2A TN 俾我識, 落針前4日Sandy好詳細咁講我聽有咩要留意。

回顧6個半月嘅治療時間充滿咗好多感恩事情, 公司medical 可以fully cover全個療程費用, 所以少咗經濟壓力。整個化療冇咩好嚴重嘅副作用出現, 只係頭2針打完第一個星期似重感冒比較攰, 輕微水腫, 飛滋都只係生過1粒, 鹽水漱口後即謝, 打完升白針頭2日會腰酸背痛, 但係冇嘔冇爛口食得瞓得。之後4針就第三四日已經可以做暴龍鬧女. 最差嘅相信係甜味變怪咪, 連最愛嘅朱古力, 可樂都變得難食; 同埋冇晒頭髮亦係一個好大嘅衝擊, 但後來發現原來我戴畫家帽都幾好睇架喎

呢個病最大得著係發現有好多人錫我寵我緊張我. 記得要同爸爸媽媽講係最難嘅, 雖然聽到消息後, 佢哋都有擔心, 但仍然鼓勵我安慰我陪我行前, 而且仲成日燉肉汁同煮海參俾我食, 專登搭車嚟睇我。家姐、妹妹、弟弟同阿姨嘅問候支持, 幫我帶兩個女去玩; 奶奶為我預備餸菜, 幫我湊女; 工人姐姐打理屋企事務; 仲有朋友和同事嘅鼓勵關心, 幫我做research邊個panel doctor好, 一切都令我勇敢向前。

而另一得著係令我一直好似火車頭咁向前衝嘅人, 可以停下腳步, 重新為自己定位. 雖然每日都會有勞氣嘅時候, 但呢大半年都令我多咗好多親子時光, 可以睇到兩個女嘅成長同進步。仲有多謝我嘅神隊友—老公, 每次打針覆診, 佢都會拖住我一齊行, 鼓勵我「呢個病有得醫架, 每次治療代表行前一步, 距離康復嘅日子就近咗」而家同老公更加重拾久違嘅拍拖感覺, 唔再只係focus喺兩個女身上。

大家一齊喺康復嘅路上加油! 健健康康到老, 睇小朋成長~