Sakura既畢業文

所有搵我既姊妹, 我都堅持同佢地傾下先, 因為我都要了解下佢咩人, 有時會whatsapp傾, 如果我覺得個姊妹好擔心, 好多問題, 我通常都會傾個電話, 因為打咁多字都幾攰, 有時我都會被拒絕傾電話不過放心, 我係唔會介意既, 所以Sakura你唔洗擔心呀! 哈哈!

恭喜你有個咁好既結果, 好同意你最後一段, 人生苦短, 病過了, 就要學懂點解上天比個病我地, 要好好咁學習放下同愛自己, 同埋我好感動你既最後一句: 會長， 有用得著我的話叫我， 我會幫手, 祝福你, 我地一齊健康到老!

*****************************************

我畢業啦～

我要多謝會長Jacqueline,又想同會長講聲唔好意思先，記得我喺仁安等睇醫生果時會長覆我mgs 嘅， 當時會長好忙， 但係你都同我講可以抽到少少時間同我電話傾， 但係我當時無打到電話 （我係宅女， 我唔係好鐘意講電話， 同埋等緊睇醫生我唔敢講電話），會長最後都接收咗我 （我諗起 有教無類 ）， 識到一班姐妹，有人同行路不孤單。

我係4月無啦啦自己摸到粒嘢， 睇家庭醫生仲同我講粒嘢彈彈下一定唔係衰嘢啦， 結果睇咗2次食咗2個星期消炎藥無好過， 我返去叫佢寫紙比我睇專科。專科醫生一按， 我見到佢臉色變咗一變， 佢寫紙叫我照ultra sound ，照ultra sound 果位醫生照完即刻幫我抽幼針， 當時都唔覺得會中招， 直到再返專科醫生覆診， 佢話見到懷疑惡性細胞，當下我問佢， 其實係咪即係中咗？ 佢話都係嘅。。。

如是者， 我即刻約返乳腺科醫生睇， 因為早期可以做手術加電療， 算不幸中之大幸，2個月後嘅今日， 電療完成了我算畢業啦， 後續嘅治療觀察繼續加油

我知道， 人生苦短， 以後要學識愛自己， 放低執著，過去的不用回想。各姐妹， 共勉之。

會長， 有用得著我的話叫我， 我會幫手