Vince畢業啦！

上星期先第一次見到Vince, 一個好瘦但好爽朗既女仔，一傾計就覺得同我同類，爽快樂觀理性既人，見到佢打左3針都非常精神，我都讚不絕口，前日佢畢業post一張好型既畢業相，同cancer道別，全group拍手叫好，大家表示十分欣賞

Vince，好返架啦，電療順順利利，我地要健康到老啊，遲啲約埋一齊行山

*************************

It all started from an itch on my boob…

2021年星期六4月10號夜晚好開心咁攤係張沙發度睇緊電視，右邊個胸突然有啲痕，咁咪拗吓囉，點知拗到有粒硬野，仲可以左捽右捽，唔似俾蚊咬咁簡單。屋企人完全冇乳癌嘅history，不過因為工作關係，都接觸過好多呢啲故事，所以即刻book星期二去睇醫生。

求其搵咗個保險network嘅醫生，佢好放心咁話俾我知應該係纖維瘤， 緊住book咗4月26號再照USG 同mammogram. 收到消息之後就好放心咁話俾屋企人知，以為冇事。點知媽咪係唔放心，同事亦同一日建議我去睇柳醫生，我就諗住既然兩個都咁講，咁就睇多個醫生啦！

20號去睇柳醫生，佢一照USG 就話粒嘢有啲肉酸，抽咗3針，俾埋份影像報告我，然後叫我22號復診。

又係因為工作關，望住份超聲波影像，即使冇文字其實都知道唔係好消息。所以22號複診嘅時候一早有晒心理準備，確診時冇心痛同埋freak out。唔知好彩定唔好彩，我阿嬸幾個月前又確診乳癌去HER2，爸爸媽媽有幫手照顧佢，所以佢哋都只係表現到眼濕濕，都冇freak out, 不過大家都好唔明點解我咁細個，成日做開運動，都會有病。

Book咗28號做手術，需然一個禮拜都唔夠就要做，但係我一啲都唔覺得太快，反而好期待解決咗件事。我係一個problem solver，我希望解決得越快越好，又係因為工作關係（好多時都試過想像如果自己有癌症會點樣）我一早就買咗份保險，知道應該咩都cover晒，同埋本身經濟都唔需要擔心，所以其實都放心。成個過程亦都係喊過三次，每次可能喊30秒，然之後就即刻revert 返去problem solver 嘅mode, 同埋show 返一個開心同輕鬆嘅樣去見身邊嘅人。好開心順利地完成手術，再乖乖地等埋份Oncotype DX report, 但由原本以為唔使化療，點知confirm 都係化療比較好。

即刻上網再搵資料，不過初時只係搵外國同英文文嘅page，點知好好彩再搵都會長嘅page，即刻message佢! 其實原本只係問佢關於頭髮同埋眼眉嘢，完全冇諗佢即刻覆我，仲比我入group ！入咗group識咗大家，學咗好多嘢，完全冇諗過係可以咁樣，更加冇諗過每一朝起身就係期待睇大家嘅message，日中又睇住大家嘅message渡過，訓覺前又係。

如果冇咗個哩個group，時間應該會過得好慢，我唔會識得飲羅漢果水，唔會放心食呢樣嗰樣，哩4針化療唔會過得咁容易。好感激會長，感激咁多位姊妹，尤其係同我差唔多年紀嘅姊妹，因為你哋解決咗我最大嘅擔心，就係將來嗰30-40年唔知點樣渡過，eg.使唔使就住就住，會唔會長命父母，etc。你哋俾我知道原來咁後生確診都可以繼續開心正常生活落去（以前我接觸得嘅病人都係好差嘅，30歲都quit 份工，唔做嘢）。係大家令我哩個大problem 都solve 到，非常非常感激！

而家我小學畢業，準備讀中學喇。讀到咩程度都好，我只係期待同大家一齊手拖手去到85歲。再次多謝會長嘅分享同埋將我哋咁多位都帶埋一齊！