Vingi既畢業文

好記得好記得Vingi搵我時話睇晒所有姊妹既畢業文，佢唔知自己有冇寫畢業文既一天，今日你可以大大聲話比自己知，係可以架，你做到了！

天父比Vingi既考驗都幾大，三陰三期，做免疫治療，點知反應太大，打到佢既器官都發炎，超高燒，入左HA幾日冇起色，毅然決定轉去私家醫院，執返條命，真係好好感恩，好彩付出冇白費，呢一針好有效果，之後就繼續化療，電療，終於可以寫畢業文啦！

Vingi係一個開心果，你既經驗可以分享到比好多我嘅資訊，希望你繼續留低幫我手，一齊繼續手拖手，拖住新嘅姊妹一齊行，大家一齊畢業，一齊到老

************************

*行到水窮處 ，坐看雲起時*

經歷十個月治療，完成左16次化療+手術+25次電療，*今日終於到我畢業了*

其實由2020年中開始已察覺自己身體有異樣，但一直拖到2021年頭先的起心肝去身體檢查，結果真係好嚇人，確診3陰性乳癌+淋巴嚴重感染，醫生話淋巴都幾嚴重，個下真係咩都講唔出，只係不斷咁喊。之後在FB搵到會長個page, 睇到好多姊妹嘅畢業文，真係好感人。之後我就膽粗粗pm會長，我仲好記得我一開始就問佢唔知自己有無機會寫畢業文，我真係好唔想咁快死，我個仔先得3歲

所以係呢到好多謝會長 @⁨Jacqueline Tong⁩成立左呢個平台，等好多同路姊妹可以互相幫助互相扶持。

雖然好多見過我嘅姊妹都覺得我長期好精神，好似無病過一樣，但我仲好記得打完第一針化療+免疫治療後，我經歷了半個月生死，住左十幾日醫院，差d就比副作用拎左條命，所以我好想多謝個時一直陪伴我嘅姊妹，多謝你地每一句安慰嘅說話。

多謝所有2.0 3.0姊妹。多謝Charmaine 陪住我做第一次化療，多得你我個日先無咁驚。

多謝百科全書Ada⁩你帶左好多快樂比各位姊妹。

多謝我個鄰居Kandy成日陪我周圍食好西

多謝吉吉，may 係我化療期送比我嘅花生衣&療康佳。

多謝三陰谷嘅姊妹，特別係Sandy, Fion仲有Ellen。

多謝Jace ⁩介紹周凱旋基金比我知

多謝ca姐 @⁨Erica Leung我等緊再同你去玩

最後要多謝我自己，因為我終於打贏左場仗。

我好記得醫生同我講，完左電療後我就要無後續治療，唔駛食藥，以後保持心情開朗就係對我最好嘅藥。

最後，祝各位姊妹身體健康，治療中嘅姊妹繼續加油 治療過程一定會遇到氣餒時，但記住行到水窮處，就一定會有出路。