Wing既畢業文

恭喜你呀, 後生女果然夠勇, 好欣賞你地心口掛個勇字就衝, 話咁快就完成, 打左場漂亮既勝仗, 叻女呀! 你講得好岩, 正能量, 同路人, 唔係發生事時, 呢2樣野都太無形, 唔會覺得有咩用, 但真係需要時, 原來佢威力無窮, 好好彩, 天父賜比左勇氣, 力量, 平安, 派左好多天使比你, 令到沿路不孤單, 所以我地心情真係影響好多野, 大家以後都開開心心, 健康到老呀!!
*****************************************
我畢業啦！
今日終於係最後一次嘅電療。諗返起半年前，知道自己cancer嘅時候，我嘅感受係一係死咗佢，一係面對佢。我所相信嘅神冇叫我去死，所以我決定勇敢去面對佢。我同神講，求你比力量我去面對之後嘅路。

一直以為自己好淡定，睇咗好多文章，已經知道自己下一步會面對啲乜嘢。點知搞掂晒啲嘢，做晒手術，等術後報告嘅時候，有一日突然間發惡夢，醒咗嗰下突然間好驚，唔知自己驚啲乜嘢，然後就諗起之前有人叫過我入嚟呢個群組。

由細到大，我一直都唔信同路人嘅威力，嗰晚發惡夢扎醒嘅時候，就一路喺度睇住facebook page 師姐嘅畢業文，個心定左落嚟，然後就PM左會長。其實我純粹問佢化療要準備啲乜嘢，係講緊好實際一個病人生活上要準備啲乜嘢，我發覺網上真係冇乜人有講到。但係，會長叫我唔好諗，出咗報告先算。其實係囉，咁早諗嚟做咩啊。然後我入到嚟呢個群組嘅時候，我個心就定咗好多，因為我知道，一講就會明白。

仲記得嗰日拎住啲術後報告，去咗睇個時間腫瘤科醫生，喺我諗緊做唔做化療嘅時候，喺群組度見到Cynthia師姐做完化療嘅靚相，我覺得真係好型，其實光頭姐，使乜驚喎。然後我就決定化療，一口氣衝過去。

不過，好真實，剪頭髮之前嗰晚，我真係喊咗出嚟，然後記得教會班年青人同我講，只要自己唔尷尬，尷尬嘅就係人哋，所以我冇去訂做假髮，我個頭又大得滯，所以只係淘寶訂咗16頂帽落嚟。化療期間入過醫院，三次吊鹽水，每次兩個針窿，再加埋落化療嗰啲，到今日，我仍然成手都係針窿。不過依啲戰績話俾我知，我終於過咗。

以前我唔相信正能量，但係依個群組話俾我知，如果冇咗神比我嘅正能量，真係唔知點過。同埋，同路人，經歷過，真係一講就明白。互相支持，真係勝過網上瘋狂地睇好多文章，自己一個人去面對。

完成電療，加埋停經針，同埋下個月開始食嘅荷爾蒙藥，治療嘅路其實好漫長，頭髮可以長返，只係要俾啲耐性，但其實身體仍然會擔心復發，下一步會點？冇人想病，自己盡晒力醫治，就算復發，又如何？最多未來早啲瞓，食少隻雞翼，做吓運動，繼續努力工作，最緊要同老公一齊享受一下人生，開開心心繼續生活。

#乳您一起youarenotalone
#乳您一起畢業感言
#化療經歷
#以生命影響生命