Winnie畢業感言

Winnie既情況，唔係佢自己搵我，係佢老公William搵我，當時Winnie係懷孕35週確診，而BB仲要心臟有事，最後一班姊妹手拖手互相打氣，睇住BB出世，睇住Winnie開始化療，睇住BB做左兩次大手術，又睇住BB好返，跟住睇住Winnie再好成功完成手術，成件事充滿愛同感恩.

Winnie, 你睇落好柔弱，但內心既你係好堅強，你既母愛令一眾姊妹動容，亦成為好多姊妹既榜樣，唔好睇低你自己既能力，你係一個好細心好包容既女仔，祝福你一家以後健健康康咁生活

Winnie既感言：

我報告一下先

我係Winnie. 懷孕35 週確診，我2B 期，her 2 Er/Pr + ki67:30% , 粒野3.x Cm ,petCT 那時照淋巴都着燈。我選擇咗先化後術。

我提早出產後就即開始化療了，Kaden BB 亦有心臟問題，出世後2個月經歷左2次大手術。 我地兩個各自作戰！

確診係我最迷惘嘅時候，遇到Jacqueline 係我一家的福份，簡直打左射燈咁話比我知前路點行，好順利搵到合適的治療方案。

BB 入ICU,做手術係我最低谷挫折嘅時候，Jacqueline 帶我遇到大家，係天賜的禮物，每一個姊妹的一句支持集氣已經有無比的力量，給我們勇敢的衝過去！一次又一次證明大家力量好強大，小勇士的手術一次比一次順利。

其實我化療6針後，真係未有畢業的喜悅，可能因為未切除舊衰嘢啦～ 到左手術前，我重好凝重咁摸下Kaden BB 心口條疤痕， 「條疤痕咁長你咪好痛囉」，佢理都冇理我繼續踢踢咁。

我手術終於完了，我麻醉醒過來就喊左一粒鐘，覺得一切都完結了，我冇事了，發咗場惡夢咁。

好感恩！柳醫生話手術比想像簡單，切得好乾淨，淋巴沒有感染，切左4粒前哨，希望病理報告繼續順利

我好感恩遇到每一個group 度有緣相遇，共患難的姊妹！ 沒有Jacqueline 同大家，我可能已經產後抑鬱，沒有生命了。多謝會長救了我生命！ 多謝大家灌溉我滋潤我！

治療中的姊妹們要加油呀！ 比信心勇字咁衝過去！ 病破壞了我們原先的計劃，但有陣時原來唔需要諗太多，計劃太多，因為上天會安排我們要相遇的人和方案，只要我們跟著做和相信就會有好成績出來。

我好感謝沿途遇到的每一個人 繼續好好享受被愛 祝大家身體健康！ 事事順利！ 齊齊畢業！ 齊齊慶祝每一個10年20年30年…. 我愛大家